Kei TOUPA na Pathian un, Lau kei un, k’on panpih ding, chi’n, na khut taklam uh lah ka len sin ngal a (Is.41:13).
Israelte buaina pi khat akhangthu ua i muhtheih tuh milim pathian ahi. Milim pathian bia a akinunghei nak ziak uh aziak bangzah hiam om ding hi. Egypt apan pikhiak a om khang masate (first generation) a ding in Egypt-te pathian lem (pagan gods) chihlouh a dang thei tam hetlou ding uhi. Himahleh khangsawnte (other generations) a ding in bel a kim leh kiang ua nam tuamtuamte pathian lem tuamtuamte muhtheih ding tampi om ding a, huai a kim leh kiang ua namdangte biakdan tuamtuam bang a om awlsam mahmah ding hi. Huaiziak in suanlam hoih taktak a bawl theih ding uh tam ding hi.
Isai 41-43 kikal i sim leh Pathian in Israelte a milimte uh ziak a ataina kimu hi. A haksat hun un a milimte un a hondam thei kei ua, lei a lingsak thei kei ua, sihna akipan hinna a pethei kei uhi. A khelhna ua kipan a honkhe thei kei ua, a mit uh a del ua, a nangong (deaf) ua, zatna bei ahi uhi. Amaute it taktak a, amau ading a kipia a, Egypt akipan pikhia a, Abraham kiang a athukhun tangtungsak Pathian om sun Amah ahi hi. Hinapi a bang ziak a taisan nak ahi ua?
Israelte tanchin i sim chiang in a mohsakhuaina uh a tam mahmah hi. Himahleh hun tamtak ah amau i batna a tam mahmah hi. Amau bang in milim pathian belou kisa mah lehang hiai khovel pathian lemte’n hon thuzoh khanak hi. I haksat hun a Pathian in hon panpih dia hon chiam hinapi in khovel thil ah kipahna leh lungkimna i zong kha sek hi. Bangchik bang haksatna tuak mahle hang, Amah i muan leh Aman hon honkhe thei gige hi. Huaiziak in i Pathian mah bel in Amah muang ni.
Tuite na ngah tan lai un leng na kiang uah ka om ding a; luite na ngah tan lai un leng a hon tum kei ding hi: mei a na pai tan lai un leng a hon hul kei ding a; meikuang in leng a hon liau kei ding hi (Is.43:2).
Unaute Toupa’ ni zingpha. Tuni kikhop nuam chiat.