Huaiziak in, naupangte lak a pasal tengteng that unla, pasal luppihsa numei teng leng that un. Numei naupang pasal luppih nailouh tengteng nou ading in hinghawi un (Nam.31:17,18).
Bible study neihpih khak zel papi khat, unaute bel hilou, in hon phone in hiai Laisiangthou tang ka sim chiang a theisiam theilou ka hi, chi’n hon dong hi. Bangziak a agallakte ulak a hiai numei pasal luppih nailouhte that lou sese a, galkuan sepaihte adia hinghawi ding chia Mosi in gen ahi dia, a gallak uh gantate bang a kithoihna a zat di chi ahi diam, ahihkeileh a ut leh dah ua bawlsiat dia phalsak ahi diam chihte hon dong hi.
Amah toh ka kikupna uh a tomkim in tuzingkal Preacher’s Thought a ding in kon gelh hi.
Hiai Nambars 31-na athu i theihsiamna ding in Israelte toh Midiante hong kidou khak theihna ding ua thiltungte i theihsiam masak kul hi:
A thu om dan:
- Israelte gamdai a avakvaihna/khualzinna hun uh beikuan Kanaan gam lut ding dinmun in hong om uhi (Nam.22).
- Moabte toh Israelte kimelmakna om hetlou hinapi in, Moab kumpi Balak toh Midiante kigukzop in, Israelte theihlouh kal in ana guk langpang uhi (Nam.22).
- Huchiin kumpi Balak in Israelte hamsiat ding in zawlnei Balaam hon guai hi. Balaam in hamsiat sawm sek mahleh Pathian in a phallouh ziak in hamsiat theilou hi. Kumpi Balak akipan kipahman a etlah ziak in Balaam in panlak dan ding (strategy) tuam a hon kawkmuh a (suggest), Israelte tuh amau sung akipan mah a suksiat theih didan Moab/Midian heutute a hon hilh hi. A thilgeel lohching ahi ding a Moab numeite khemna ah Israel pasalte thanghuai tak in hong puk zeizui uhi (Nam.22-25).
- Balaam thilgeel bel numeite zang a Israelte milim biakna a kaipuk ding chih ahi: “Shittim a Israelte a tam sung un, pasalte’n Moab numeite a luppih uhi. A pathiante uh ma a kithoihnate ah a chial ua; huchi in a ne ua, a pathiante ma ah a kun uhi. Israelte’n Peor Baal a besamta uhi. Huchi in Israelte tung ah Toupa hehna a kuangta hi” (Nam.25:1-3).
- A khelhna ziak un Pathian in hipi in Israelte hon gawt ek a, mi 24,000 tak hipi in hong si uhi (Nam.25:9).
- Huchiin Pathian in Mosi kiang ah, “Midiante melma bang in en unla that vek un. Peor tungtang thu a hon khem a, melma bang a hon bawl ziak un” achi hi (Nam.25:17-18).
Hiai in tuni a i tangteel omna Nambars 31-na thu hon tun hi. Pathiain in Mosi kiang ah, “Midiante tung ah Israel suante phu la in” achi hi (Nam.31:1). Huaiziak in Mosi in, sepaih 12,000 telkhia in Midiante hon dousak hi (Nam.31:5). Amau zekhem a bawltu Midiante kia tup anei in hon dou ua, hong vualzou mah ngei uhi (Nam.31:7). Himahleh Midian mipi teng hon that chimit lou in, Midian numei teng leh a tate uh, a gan teng uh, a belam hong teng uleh a van teng uh gallak in hon la uhi (Nam.31:9-10).
Galzou a hong kik sepaihte Israel mipi’n ana dawn lai un; a zahmohte uh vanzat a zang a, Israel pasal susia numeite ngawingawi hinghawi a, gallak a hon lak ziak un sepaihte tung ah Mosi hong heh hi (Nam.31:14). Peor tungtang thu a Midiante tung a phuba a kilakna ziak numeite’ numeina vanzat a kizang ahihman in, numeite tuh a khialpipen khat ahi ua, himahleh pasal luppih khak nailouhte bel hiai tungtang ah a tel kha kei uh chihna suak hi. Huaziak in Mosi in, “Naupangte lak a pasal tengteng that unla, pasal luppihsa numei teng leng that un. Numei naupang pasal luppih nailouh tengteng nou ading in hinghawi un” chi’n thupiak hon pia hi (Nam.31:17,18). A hinghawi uh numei pasal luppih nailouh teng a vek un 32,000 a pha uhi (Nam.31:35).
Pathian thupiak bang in hiai agallakte uh hon hawmzak uhi. Numei siangthoute lak ah akimkhat 16,000-te galdou a kuan sepaihte kiang ah hon pia ua, a kimkhat dang 16,000-te Israel mipite kiang ah hon hawmzak uhi. Sepaihte adia 16,000 piak a omte lak ah siampu Eleazar kiang ah 32-te Toupa adia siah (tribute) a piak in om uhi. Israel mipite kiang a hawmzak a omte lak ah mi 320-te Toupa biakbuk kemmi Levite kiang ah piak in om uhi.
Hiai Midian numei siangthoute toh kisai i ngaihtuah theih bangzah hiam om hi.
- Israelte toh Midiante hong kidou khakna ding ua Midian numeite khelhna ah amau mohna nei khalou uhi. Pasal toh lumkhawm kha nailou ahihman un Israel pasalte khemtu numeite lak ah pangkha kei uh chihna suak hi. Huaiziak in a hinghawi utuh ahi di mah ahi chih muhtheih hi.
- Israelte lak a hon hawmzak utuh hehpihna nasep ahi chih theih zaw hi. Midiante omna khua teng uleh agiahna phual teng uh ahal beisak vek uh ban uah pasal teng thahsak vek uh ahihman in kiknawn theihna ding mun leh mual neilou uhi. Israel mite insung leh amau lak a hong khosa a khanglian ding ahihman un Israel nam ah hiplut in hong om thei zaw ding uhi.
- Thangbawl a sualluih (rape) theih ding a piak hilou uhi. Nambars 31 leh Laisiangthou koimun mah ah numei sualluih a phalna omlou hi. Kanaan mite hamsiat ahihna uh i mu a (Gen.9:25), huaiziak mah in Israelte Kanaan gam a hong lut un Pathian in a gam mite thah chimit ding chi hi. Himahleh numei bawlsiatna ding a athupiak i muhlouh kia hilou in, numeite thanghuai tak a hon sualluihna uh muh ding khat le omlou hi. Gallakte zi a neih theihna dia Pathian thupiak i muhna Deut.21:10-14 ah leng thanghuai tak a bawl ahihlouh dan muh theih hi. Numeite thanghuai tak a bawl asualluih tuh Pathian dan kalhna ahi zaw hi.
- Huai hunlui tawndan (custom) i et leh numeite’n kum 13 vel in pasal nei uhi. Huchi ahihleh tuni i tangteel a pasal luppih nailouh numei kum 13 vel sang a upa zaw bang a om khak leh zi ding in laktheih ding uhi. A naupang zaw numeite bel Israelte lak ah hong khosa in, sinsak a om in, a nasem sikha (servant) un pang thei ding uhi. Israelte mah hon bang thei (assimilate) ding uhi. Hiai dan pian in Gibeon mite leng Israelte lak ah hong om uhi: Huai ni’n Joshua in a seh bang in paikhawmte leh Toupa maitam adia singpawmite leh tuitawimite in a sep a, tunitan in hiaite in a pang uhi” (Jos.9:27).
Huaiziak in Midian numei pasal luppih nailouh teng ahon hinghawi utoh huhamtak a ganhing bang a kithoihna a zat ding hiam, ahihkeileh thanghuai tak a ut leh dah a bawlsiat ding hilou in, hehpihna nasep hizaw ahi chih muhtheih hi.
Unaute zingpha. Tuni hun zatnuam chiat.