Huchi’n kumpipa a lungdongta mahmah a, kulh kongpi tung a dantan ah a hohtou a a va kap a: huan, a paitouh kawm in, Aw, ka tapa Absalom, ka tapa Absalom, na sih sik in si zaw mai leng maw, aw Absalom, ka tapa, ka tapa, a chi hi (2 Sam.18:33)
Tuni a i tangteel tuh kumpi David in a tapa Absalom sih thu a zak a omdan leh kahtam ahi. Hiai ah nu leh pate’n tate a it dan muh theih hi. Tate bang chituk in gilou, khel, mi hoihlou leh nu leh pate simmoh in kalh mah le uh; hiai ten nu leh pate itna beisak tuanlou hi. A thumanglou deuhte leng a thumanlouh ziak mah un a itna uh lian deuhdeuh zaw hi. Hinapi in tate’n nu leh pate’n hon it zoulou dan a kingaihtuah khak a baihsam mahmah hi. Tuni i tangteel apan nu leh pate itna phawk thakthak ni.
David in a tapa Absalom a sih a a omdan leh Bathseba toh a ta naungek sih hun a a omdan kilehbulh mahmah hi. A ta naungek sih thu azak in lungmuanna khat nei a bang a (2 Sam.12), himahleh Absalom sih thu a zak in a lungkham mahmah hi. Bangziak hi ding in na ngaihtuah a?
A ta naungek a sih in bel, “A kiang ah kei ka pai khongkhong ding a, himahleh amah zaw ka kiang ah a hong kik nawnta kei ding” (2 Sam.12:23) chi’n a kinem thei a, himahleh a tapa Absalom bel Pathian mai a hel a si ahihziak in huai a chithei kei hi.
Hiai ah nu leh pa ten i zil theih ding om din gintakhuai hi. Nu leh pa ten tate Pathian lau dia i pina ah Pathian in hon makaih henla, Laisiangthou a mi masate hih khelhnate apan sinlai hoihtak la thei din hon ompih hen.
Unaute zingpha. Tuni hun zatnuam chiat