Aw Jakob, ka nnasempa, lau ke’n, ka hon ompih ahi, chih TOUPA thu pawt ahi: ka hon delh zakna nam tengteng ka beisak ding a, nang zaw ka hon beisak het kei ding: diktak in ka hon gawt ding a, gawtlouh in ka hon khak kei ding hi (Jer.46:28).
Nu leh pate a ding in tate bang tan chet a thunun hoih ding ahia chih theih haksa mahmah hi. Laisiangthou mun tamtak ah tate thunun a poimoh dan muh theih in om hi (Pau.12:1; 13:24; 15:32; 22:15; 23:13; 29:15). Huchih kawmkawm in Laisiangthou mah in tate hihthangpai a, hih nuak louh ding chih hon hilh a (Eph. 6:4; Kol. 3:21); a khengval a i thunun khak chiang in hihthangpaih khak theih zel hi.
Nu leh pa lohchingtak a tate ana pichingsakte enton phatuam mahmah hi. Tate a thuhilh (correct) chiang ua a paukamte uh, tate’n thu a manglouh chiang ua a sinsak dante uh etton theih hi. A kampau dan uh, a thunun dan uleh tate a hoihna uh a pahtak dante ua pan zil theih om hi.
Ahia, van a i Pa omdan etton sang a nu leh pa hoihzaw omlou hi. Tunia i tangteel a i muh bang in, diktak leh a hun geih in (in just measure) hon thunun (gawt) thei hi. Thukhun Lui hun a Israelte tangthu tuh nu leh pate a ding in kisinna vanzat (training manual) hoihtak ahi. Pathian’ thu sim in, Amah tuh tate thununna toh kisai in “role model” hihsak sawm chiat ni.
Pa aw, nu leh pate ka hihna uah Nang akipan etton ding hoihtak non lahte ziak in ka kipak uhi.
Unaute zingpha. Tuni hun zatnuam chiat.