Naphtali tapate: Jahziel, Guni, Jezer, Sallum, Bilhah tapate (1 Kro.7:13).
Kronikul khatna bung 7 leh bung 9 kikal Israel namte khangthu ngen ahihziak in sinlai lakna dia gelh theih ding tam hetlou hi. Himahleh tuni i tangteel lunglut huai luatna khat om hi. Naphtali toh kisai tang khat sung kia ah kigelh a, Issachar tangnga sung ah, Benjamin tang sagih sung ah, Manasseh tang guk sung ah, Ephraim tang sawm sung leh Asher tang sawm leh khat sung ah gen in om uhi.
Aw gentaak louh Naphtal aw!
Naphtali nam toh kisai theih tam in om hetlou hi. Naphtali tuh Rachel’ sikha, Bilhah tapa nihna ahi (Gen.30:7-8). Naphtali nam sung apat galhang pen a theih a om Barak leng galhang chih taak louh hi (Vai.4:6-9). Israel mite Kanaan-te dou dia a pi ngamna ziak leng Deborah in a tonpih ziak hi zomah hi. Minhoihna Barak tung sang in Deborah piak in om zaw lai hi.
Naphtali-te’ tenna tuh Israel mallam gam, Asher-te toh gamgi, simlam pang Kinnereth (Galilee) dil toh kizom ahi hi (Jos.19:32-39). Jesu Khrist hun in hiai huamsung (area) tuh Judea gam a Juda ten mun botloh, Pathian thu awilou Gentile-te tenna mun a angaih uh ahi.
Zawlnei Isai in hun nanung ah hiai gam tuh thupitak a omsak a om ding ahihdan ana gen a (Isa.9:1); hiai genkholhna tuh Jesu leitung a hong pai in sukbuching in a om hi. Jesu leh a nungzui teng, Juda chihlouh Galilee gam mi ngen ahi uhi. Jesu’n a nasepna (ministry) tamkhop leng hiai huamsung ahi hi. Huchiin zawlnei Isai in, “Mi mial nuai a om ten vak thupitak a muta uh” (9:2) chia ana gen tuh a tangtungta hi.
Naphtali akipan Pathian in mi neute hihlian zel ahi chih i mu thei hi. Bangmah lou a kingai hinkhua zang kha na hihleh tuni i tangteel a Naphtali akipan kihanthawn in. Na tanchin toh kisai Pathian in tamtak a gelh nuam om lai ahia; huaiziak na tanchin a gelhzom theihna ding in Amah mun pia hi.
Unaute zingpha. Tuni hun zatnuam chiat