Huchi’n Danial a inn ah a pai a, Hananiate, Misaelte, Azariate, a lawmte kiangah huai thil tuh a theisak ta hi. Huchia amau te’n hiai thuguk tanchin a van Pathian chitnate a nget theihna ding un; huchia Danial leh a lawmte Babulon a mipilte lak ate toh a manthat louhna ding un (Dan.2:17,18).
Tuni a i tangteel tuh Babylon kumpi Nebuchadnezzar in mang (dream) a neih, Babylon mipilte kianga a mang leh a hilhchetna hilh ding a anget, ahilh thei a om louh ziak ua thah chimit ding a thupiak a bawl thu toh kisai ahi.
Hun haksa tak na tuah hun in kua na sam masa pen a? Pathian a ginna nei, lawm na neih a om hia? Na lawmte’n Pathian na ginna hon hatsak uhia ahihkeileh hon dal zaw? Pathian kiang ah thum ding in kal hon suanpihna uhia?
Daniel in a hinkhua a hun haksa tak a tuah hun in bang hih ding ahia chih a thei mahmah hi. A lawmte kiang ah atun a, Pathian ah kiang ah a thum ua, a panpihna a ngen khawm uhi.
Khristian tamtakte’n Daniel bang a lawm hoih a neih louh ziak un poi mahmah hi. Nuam a sak hun uh, a kipah hun un a ut dandan a anuihkhawm pih ding uh lawmte nei mahle uh, hun haksa taktak hun a Pathian lam zotpih ding lawmte nei khalou sek uhi. Huaiziak in haksatna hon tuah chiang un Pathian lam naih sang in a ginna uh a tolhmang pih kha sek uhi.
Pathian lam hon naihpih ding lawm na neih kei leh, huchibang mite lawm ding in zong in. Khat vei tei hun haksa, na lungkiat hun om ding a, hon hanthawntu ding na poimoh ding hi. Pathian kiang a hon pi ding, na thum khawm pih theih ding leh hon thumpih thei ding lawm na poimoh ding hi. A thumna uh Pathian in a ngaihkhiak, Pathian lau mi diktat na poimoh ding hi.
Huchibang lawm hoih muh a haksa mahmah kha ding. Huaiziak in tuabang lawm nei kha na hih leh amaute ziak in Pathian kiang ah kipahthu gen in.
Pa aw, ka haksat hun ua hon thumpih thei ding, nang hon it lawm ka neih khakte uh ziak in kipahthu kon gen uhi. Hiai bang hamphatna nei khaloute tuabang lawm hoih mu thei ding in panpih in.
Unaute zingpha. Tuni hun zatnuam chiat.