Huchi’n Danial in laigelh ah min a kigelhta chih a theih in a innsung ah a lut a; (a dantan sung a a tawlette Jerusalem lam a hon ahi uhi; ) huan a khuk tung ah a khukdin a, ni khat in thum vei, huchi’n a thum a, a malam a a hih bang in, a Pathian ma ah kipahthu a pia hi (Dan.6:10).
Na Jerusalem koi ah?
Daniel tanchin leh a dinmun ei toh kibulhtuah theih hi. Gamdang a om, khosa, ei toh kibanglou namdang mi (khalam ah) ten hon umsuak vek uhi. I paudan a kibang kei a, amau pathian lemte bia in, tamtakte’n ei (khristiante) a hon deih kei uhi.
Hiai tuh thillamdang ahi kei hi. Khovel aa ihihlouh ziak ahi (Jn.17:14-16). Babylon gam mi hilou in, Jerusalem’ khomi ihi zaw hi. Ahihleh ei a din i Jerusalem bang ahi dia?
Jerusalem tuh Pathian tenna mun, i Hondampa’n eite hon ngakna mun ahi. I omna ding a Pathian in tangtawn khopi dia a bawl, mi teng pau khat, pau kibang a i pauna ding mun ahi. It tak leh duat tak a pom a i omna mun ding ahi hi (Heb. 11:10; 12:22; 13:13-14; Kil.21-22).
Pathian mai a khukdin a i thum chiang in Jerusalem lam i nga kha hi. Thumna in neih a i omna mun (where we belong) Jerusalem toh hon kichimatsak hi.
Pa aw, na tate teng ka omkhawm theihna ding uh hiai bang mun hoih non bawlsak ziak in ka kipak uhi. Na Tapa’ sisan tungtawn a hiai mun luah thei ding ka hih ziak un kipahthu kon gen uhi.
Unaute zingpha. Tuni hun zatnuam chiat.