Gamdai ah leng mi’n a ta a puak bang a Toupa na Pathian un hiai mun na tun tan un lamtawn a ahon puakdan na mu ding uhi, ka chi hi (Deut.1:31)
Singtang khawng a khosa ngei ten i thei ding a, gari khawng hon tunma in tate toh Lamka khawng zin te a tate pai zoulou a abah ziak un liang (shoulder) leh nung khawng a tate a puak thoh hun uh om sek hi. Agil uh hong kial a, a dang uh hong taak (thirsty) a nek ding leh tui dawn lemtang ding bang a hong om louh chiang un hong kiphin hun uh a om sek hi. Hinapi in tate itna ziak in nisa-vuahzu nuai ah phun hetlou in tate puak in a om sek uhi.
Ta dinmun a i om sang mah in pa dinmun khawng i hong tun leh tate a itna uh a thupi dan ka musuah thakthak hi. Sum leh a neih sunsun ua van lei dia honpi a zinpih kia uh hilou in, lungsim leh tha tawl hun laitak a tate kiphinna khawng duatzou tak a abuaipih uh thupi kasa mahmah hi. Tulai dan a tate kiphin hun a khemna ding youtube leh mobile game chihte khawng om hetlou hi a! Huai dinmun ah dingh le hang kuamah agim-atawl omlou om hetlou ding hi.
Hiai ni khat ni nih i khualzin hun a tate puakna i gimte toh kum 40 zen gamdai a khualzinna teh theih hetlou hi. Himahleh Pathian in Israel tate tung a ana dohzoh dan bangtan hiam hon musak thei hi. Gamdai khualzinna a gim, gilkial leh phunchiak Israel mipi tung a adohna in a itdan hon langsak hi.
Israelte tung a Pathian dohzohna in ei leng lametna hon pia hi.
Pa aw, ka puk ua, ka kah ua maban sawn zom zel dia ka gimluat chiang ua hon phong a non puakthoh zel ziak in na tung ah kipahthu kon gen uhi.
Unaute zingpha. Tuni hun zatnuam chiat