Khe a a pai mite na kitaitehpih a, nang a hon bahkhit sak uh leh bangchi’n ahia sakolte na kitaitehpih theih ding? muanna gam ah bittak in om lechin leng, Jordan gam gammang ah bangchi’n ahia na hih ding? (Jer.12:5).
Tuni a i tangteel tuh Pathian in zawlnei Jeremiah’ phunna, “bang ziak a mi hoihloute lamzang uh ahia?” chih a dawnna ahi. A dotna dawnna sang mah in leng taihilhna achih theih phial hi.
Pathian’ dawnna gendan tuam deuh in gen lehang hiai bang in gen theih ding hi:
“Jeremiah, bang ziak a mi hoihloute lamzanna lunghimohpih (bother) na hia? Kei adia na taina ah, na taipih mihingte lel in hon bahsak zou ahihleh bang chi dan in sakolte toh na kitaiteh thei dia? Na kibatpih mihingte lak a galmuang theilou na hihleh, Jordan gammang, sahangte (lion) tamna mun (cf.Jer.49:19; 50:44; Zek.11:3) a na pai chiang in bang na chi dia? A haksa taktak tuak nailou na hi, na kong ngak in, hiai sang a lungkiat huai zaw phu lai di na hi.”
Hiai tuh Jeremiah buaina, “bang ziak a mi hoihlou ten nuamsa” chih toh kisai a Pathian dawnna i muh ahi. Jeremiah mah bang in Asaph leng kisuipuk ding a khem in ana om a, himahleh hiai bang in theihsiamna hon neihdan agen hi: “Hiai ka theihsiam ding dan ka ngaihtuah aleh, huai ngaihtuahna kei a ding in ana lua hi. A tawpa, Pathian inn siangthou kava lut aleh, a tawpna ding uh ka va theikhia hi” (Sam 73:16,17 – Parallel Bible). Mikhialte khovel ah lohching leh nuamsa bangmah le uh a tawpna a atuah ding uh i ngaihtuah chiang in a nopsakna uleh lochinna uh bangmah hilou hi. Huaiziak in Pathian in amaute ziak a bah a, kihihlungkham ding in a mite ana deihlouh hi. David in, “Thil hoihlou hihte ziak in kihih lungkham nuam dah inla, diklou tak a hihte leng eng ke’n. Loupa bang in at paih in a om zok ding ua, louhing bang in a vuai ding uh ahi ngal ua” ana chi hi (Sam 37:1,2).
Pathian’ ta himah lehang haksatna tuamtuam i tuah chiang in zawlnei Jeremiah, Habakuk leh Pathian’ mi tuamtuamte mah bang in, “Bang ziak a mi hoihte genthei a, mi hoihlou ten nuamsa ahia?” chih dotna kinei khanak hi. Himahleh Laisiangthou ah i lungkimna ding dawnna i mu khol kei hi. Zawlnei Habakuk in a thil tuahte apat in Pathian lam ah dinmun sangzaw ana neih loh hi. Huaiziak in ei mihingte muh dan kia hilou in Pathian’ muhdan kikoppih thei dia kisin poimoh mahmah hi.
Unaute zingpha. Tuni hun zatnuam chiat.