Mihai lampi amah mit ah a dik a; himahleh kuapeuh a pil in thupha a ngai khia hi. Mihai buaina tu mahmah a theih ahi: himahleh mi pilvang in zahlakna a sel (Pau.12:15).
Mipil in mite thuhilhna ngaihkhiak theihna leh midangte engbawlna nelhsiah theihna a nei hi. Bangziak a hichia om thei ahia ichihleh kingaihniamna (humility) a neih ziak ahi hi.
Paunakte laibu in pilna agen tuh laisiamna leh thil theihtheihna hilou in, kingaihniam theihna ahi zaw hi. Mihai tuh amah kia dik kisa in, amah mit ah amah a dik gige hi. Theihlouh neilou kisa in, midangte thu a ngaikhe nuam kei hi. Huaiziak in sukheh a haksa het kei hi.
Alehlam ah mipil bel amah kia a kingaithupi kei a, midangte ngaihdan leh thuhilhna leng a ngaikhe thei hi. Amah bawldikte tung ah ningkitel lou in a kipakzaw hi. A kingaihniam theihna ziak in midangte thuhilhna a ngaikhe thei hi.
Hiai a kingaihniam theihna ziak mah in midangte muhsitna leh gensiatnate ah a bil a ngongsak thei hi. Midangte engbawlna leh musitnate a theitum a, huaite ziak a hehna in amah adia thilhoih tunlou zaw ahi chih a theisiam hi. A hoihlam a sawiselna (constructive criticism) theisiam in, a bil a hong hi.
Hiai bang pilna kisin a, nei thei chiat ding in Pathian in hon vualzawl hen.
Unaute zingpha. Tuni hun zatnuam chiat.