Toupa’n Mosi a houpih a, “Siampu Aron’ tapa Eleazar’ tapa Phinehas in a lak ua kei adia phatuam a ngaih ziak in Israel suante apan ka hehna a heimang a, huchiin ka thikthusiat ziak in Israel suante ka hih mangthang kei hi”, achi hi (Nam.25:10,11).
Shittim a Israelte a tam sung un, a pasalte un Moab numeite a luppih in a pathiante uh kithoihnate uah tel in ama uah kuun uhi. Huaiziak in a tung uah Pathian hehna kuang in Mosi kiang ah, “Mipite heutu tengteng pi inla, Toupa hehna lauhuai takmai Israelte tung apan a kikhinmang theihna ding in sun khovak ah amaute that in” chi in thupia hi. Huchiin Mosi in Peor Baal biakna a tel peuhmahte that vek ding in thu apia hi. Hiai thu ziak Israel mite kapa a a om lai un, a mitmuh un Israel mi Zimri in Midian numei Kozbi hon tonpih a, siampu Phinehas in a teipi in ana dawtlum hi.
Tuni a i tangteel a imuh bang in hiai Phinehas thilhih in Pathian a kipaksak mahmah a, Israel-te tung a ahehna leng a beisak zou hi. Pathian in Israel-te khelhna, milim biakna ah a thangtatnate uh ngaikhawk mahmah ahihdan imu thei hi.
Phinehas bang a Pathian in khelhna a amuhte ngaihkhawk pih tuh Pathian kipahlam ahihban ah midangte humbitna chi khat leng ahi hi. Itna toh thutak gen ngam a, Pathian mai a i thilhih bang chiat pulak a a om hun chiang a siam i tan chiat theihna ding ua vaulawkna thu gen zelzel tuh i mohpuakna ahi chih ngaihtuah thak ni.
Pa aw, nang khelhna na muh bang a khelhnana ka muhsam theihna ding uleh na siampu Phinehas bang hangsanna ka neih theihna ding un hon panpih inla, na thutak thei nailoute kiang a itna toh thutak gen ngam ding in hangsanna hon pia in.
Unaute zingpha. Tuni hun zatnuam chiat