Huan, Saula ta Jonathan tapa Mephiboseth bel David kiang ah a hong a, a mai a lei si in chibai a buk a. Huan, David in, Mephiboseth, a chi a. Aman, En in, na sikha, a chi a, a dawng a. Huan, David in a kiang ah, Lau ken: na pa Jonathan ziak in ka hon hehpih ngeingei ding, napu Saula gam tengteng ka hon tangsak nawn ding a, ka dohkan ah an na ne gige samta ding, a chi hi (2 Sam.9:6,7)
Mephibosheth kua ahia?
- Panpihtu di neilou, khebai (2 Sam.9:3), huai le a langnih tuak a bai hilai (9:13); amah leh mah hoihtak a ki-enkol theilou, midang panpihna a kinga chihna ahi. Tanglai hun in (ancient times) in Mephibosheth bang a khebaite khutdoh in om tangpi uhi.
- David’ melma lianpen, Israel-te kumpi lui Saul inkuan mi ahi (9:1). Tanglai hun in kumpi khat in kumpi dang apan laltutphah a lak chiang in (abiik tak in a kumpih hihna khah utlou a pe utlou teitei-te bang), a kumpi masa suan leh khakte thah vek in om sek uhi.
- Kumpi David in zahngaihna apia hi. A hinkhua a humbit kia hilou in, a tung ah hehpihna pia in adohkan ah a tapa bang in a tate toh an um ding in a bawl hi (9:11). A melma lianpen’ tupa, mihing etdan ah zatna bei amah kep ding in a la hi.
Mephibosheth bang in ei hinkhua i kimu thei de aw! Panpihtu di neilou, zatna bei, lametna neilou a i om lai in ei a ding in Jesu a hong si hi. A melma himah lehang i tung ah zahngaihna hon suah in i tang in hong si a, Kumpipa dohkan ah amah toh an um khawm thei ding in hamphatna hon pia hi.
I hat nailouh lai in, a hun tak in Khrist tuh Pathian limsakloute sik in a hong sita ngal a. Mi dik sik a sih, mi a ut ngel kei hial ding ua, mi hoih sik in bel mi kua hiam bek in sih a ngap khamoh kei ding. Himahleh, Pathian in a hon itna a langsakta mikhialte i hih lai a Khrist i sik a a sihna ah (Rom.5:6-8).
Nipikal Nimasapen ni teng a Kumpipa dohkan i nek a i um zelna ah, Mephibosheth bang in en leng, “Kei, ui pul bang phet, na sikha bang ahia a hih a na limsak?” (9:8) chi’n Toupa i dawng kik thei sam diam?
Unaute Toupa’ ni zingpha. Tuni kikhop nuam chiat