Huan, Adam in, hon ompih ding a n’on numei piak in singgah a hong pia a, ne kei ve, a chi a. Huai, Toupa Pathian in, numei kiang ah, na thilhih hi bangchidan ahia? a chi a. Huan, numei in, gul in hon khem a, ne kei ve, a chi hi (Gen.3:12,13)
Evi in Setan khemna dou zoulou in, theigah ne a, amah deihtelna a theigah ne ahihdan kitheihmohbawl in, gul a ngoh hi. Adam mah inleng, Evi piak theigah amah deihtelna a anek hinapi, Evi ngoh in amah kidiksak hi. Midang ngohlou in, amau hihkhelh ahihdan kiphawk in, kisik le uh Pathian ngaihdamna tang ding un gintakhuai hi.
Khristian tamtak ten hiai bang lungput kinei kha sek hi. Pa hoihlou ten zite ngoh, zi hoihlou ten pasalte ngoh, ta hoihlou ten nu leh pa ngoh in, mahni kidiksak in midangte kingoh kha sek hi. Himahleh hihkhial leh ngaihdamna poimoh ihihdan lungput i neih chiang in, Pathian apan ngaihdamna, midangte apan ngaihdamna leh eimah apan midangte ngaihdamna theihna hong piang thei pan ding hi.
Unaute zingpha. Tuni hun zatnuam chiat.