Hoih na sak lam ahihleh hiai gam ka luah ding un hon pia inla, Jordan lui hon pi galkah dah mai ve, a chi ua (Nam.32:5).
Tuni a i tangteel tuh Israel tate Gilead gam a hong tung ua Gad leh Reuben suan ten Mosi kiang a athugen uh ahi.
Gilead ahong tun tan un haksatna tampi hon pal galkaita uhi. Kum sawmli zen gilkial-dangtak hon thuakkhinta ua, gamdangte apan douna, gul lauhhuai taktak leh lampi sautak khualzinna hun hon zangkhinta uhi.
Gilead tuh Jordan suahlam pang a om, leihoih na mun, Kanaan gamchiam toh gam kizom a om ahi hi. A sung a lut a, a gam va luah mai ding dinmun in a omta uhi. Kum 40 zen a ngak uh, khuaizu leh bawngnawi a luanna gam, amau suanlouh grape gahte, amau tohlouh tuilehte (well), amau lamlouh inn hoih taktakte leh amau bawllouh khopi a teng a azar azoh hun uh ahita hi.
Himahleh Mosi lametlouh lamtak in, nam (tribe) nih a lut ut kei uhi. Reuben leh Gad suante tuh Gilead ah a lungkim maimah uhi. Kidouna ning gawpta in, hiai mun a inn leh lou lamkhiak a, hinkhua nuamtak a zat mai a lunggulh zawta uhi. Huchiin tuni i tangteel a i muh bang un, Mosi kiang ah, “Jordan lui hon pi galkah dah mai ve” hon chita uhi.
Mosi, huai gam lut ut mahmah, phalsak a omlou makaitu a dinga ningkitel huai ding dan a ngaihtuah theih mai hi. Huchiin, “Na unaute uh kidouna ah a hoh ding ua, nou bel hiai lai ah na na om maimah ding uh maw?” chi in a dawng hi.
Hiai in nang leh kei dinmun hon lakkha in na thei hia? Gilead a lungkim lua a ten det ut in i om hia? Khelhna toh kidou gimgawp ihita maimah diam? I tenna khovel a Pathian in vualzawlna hon piakte toh lungkim mahmah a, maban gamchiam, vangam zuan peih nawnlou maimah a kikhual in i om kha hia? I unaute khelhna dou a pangte panpih utna nei nawnlou ihita diam? Biakna a i tel a kikhopna hunte a i tel tan lel a lungkim ihi mai diam? Hiaite tengteng i khalam hinkhua ah ki-et thakthak poimoh hi.
Mosi in tuni in ei kiang ah leng, “Na unaute uh kidouna ah a hoh ding ua, nou bel hiai lai ah na na om maimah ding uh maw?” chia hon gen ut hi maimah kha ding hi.
Khristian tamtakte leng khovel i khualzinna ah, gamchiam tung manlou a Gilead, khovel leihoih leh vualzawlnate ziak a gamchiam zuan ut nawnlou a lungkim kitam mahmah kha ding hi. Israel ten Kanaan alutna ding ua Gilead a lungkim mailou a, gal adou zom zel uh bang in; khalam gal dou zom zel a, lungke lou a pang ding in kisa ni.
Unaute zingpha. Tuni hun zatnuam chiat