Huan, TOUPA a pi leh pute uh Pathian in a kiang uah theihtawp a phatuamngai in mi a sawl a, a mite leh a omna mun a lainat ziak in; Himahleh Pathian mi sawlte a na musit ua, a thute a ngaineu ua, a mite tung a TOUPA hehna a hong thou a, hihlungdam nawnna mahmah omlou khop in a zawlnei a hihgim uhi (2 Kro. 36:15,16).
Tuni i tangteel a 2 Kronikul laibu tangthu tawp dan a lungkham huai mahmah hi. Kumpi Josiah hun in Dan laibu muhsuah a om in, milim biaknate suksiang in hong om a, Paikan Ankuang leng pat thak in hong om hi. Himahleh hiai tungding nawnna (restoration) in hun sawt a daih het kei hi.
Josiah hun in zawlnei Jeremiah in a ziak khat hiai bang in ana gen hi: “Huchipi’n leng a sanggamnu, khemhat Juda lungtang tak (whole heart) ka kiang a hong kik lou in a khem lel (pretense) in a hong kik a, chih TOUPA thu pawt ahi” (Jer.3:10).
Etzual in hoih in kilawm mahleh lungsim teng hilou a, a kim khat lel a kibawl hoih in sawt a daih kei hi. Lungsim tengteng toh Pathian deihdan zui a kitunding thak poimoh mahmah hi. Huaiziak in i lungsim tengteng leh lungtang tak mah toh Pathian naih in panlak sawm chiat ni.
Unaute zingpha. Tuni hun zatnuam chiat.