Mipi te’n Pathian leh Mosi kalh in, Gamdai a si ding a bang dia Aigupta a kipan hon pikhia na hia? Tanghou lah om lou, tui lah om lou: hiai tanghou kihhuai lah ka hinna un a kih hi, a chi ua (Nam.21:5)
Edom Kumpipa’n phalna a piak louh ziak in (20:14-21) Israel ten tangtak a Kanaan gam lut theilou in Edom gam pel in Hor tang lam ah hong pai uhi. Kanaan mi, Arad Kumpi in Israel-te Kanaan zuan a hong pai uh ahi chih a theih in ana sual a, khenkhat salmat a hon nei hi. Huchiin Israel-te Pathian kiang a thum in vualzohna ngen ua, anget bang un Pathian in vualzou sak hi. Himahleh Hor tang a kipan in Tuipi San lam ah Edom gam pai kual a hong pai lai un, lampi kual ziak in mipi lungkim lou in, Pathian leh Mosi kalh in hong phun uhi. Pathian thangpai in gul gukhah sawl a, gul tuk ziak in tampi’n sihloh uhi.
Pathian in Aigupta sal akipan pikhia a, a thilhih thupitakte a mit mahmah ua mu hina zenpi a douzoh hetlouh uh khelhna tuh phunchiakna khelh ahi chih theih hi. Tuipi San hon kan dek ua kipan Kanaan a lut dek tanpha un leng Mosi hiam Pathian hiam kalh in phun den uhi (Exo.16:2; 17:2; 32:1; Nam.11:1; 14:2; 16:3; 17:6, 28; 20:2; 21:5).
Pathian in phunhatna kichi ngaikhawk mahmah ahihdan Nambars laibu apan zil theih hi. Khristian ten leng i hinkhua a i thiltuah tuamtuamte ziak in bang in Pathian tung hiam, ahihkeileh khalam a hon makaihte tung ah i vui hun, i lungkim louh hun, i phun hun om kha sek hi. Huaiziak in vuina sang in Pathian vualzawlnate en i khalam hinkhua zang le hang, ei a ding a ahoih zawk ban ah i Pathian leng kipak zaw ding hi.
Unaute zungpha. Tuni hun zatnuam chiat