Leitung pumpi ah Coronavirus hiipi natna vei leh hiai hiipi ziak a sihna tuak niteng in kibehlap den lai hi. Hiai hiipi in bang tan hon daih ding, mi bangzah in hiai natna neih beh lai ding, mi bangzah in sihna tuaktou lai ding chih theihzoh hilou hi.
Hiai bang hun lamdangtak a ding ihihna ah hiai hiipi vei khak ding lau in na lungsim a thawmhau ngei hia? Hiai natna thuak in sihna bang kituak khaleh, ka tate bang in hon vei kha le uh, ka tanau-lainate bang in hon vei kha le uh chihte lau in lungsim gimtak in na om kha hiam? Na lawm na vual, na meltheih leh tanau laina hiai hiipi suknat khakte ziak in lunggim leh thawmhau tak in na om hiam?
Hiai bang thawmhauna leh lunggimna i neihkhak leh ei kia hilou ihi chih thei ni. I Toupa Jesu ngei leng Pathian’ tapa hilhial himahleh leitung a hong pai lai in lungkhamna in pel tuanlou in “Pa aw, ahihtheih leh hiai nou in hon pel mahmah hen” (Matt.26:39) chi in na thum hial hi. Hun paisa ah Pathian mi ten ana tuak ua, tu hun in leng i tuak a, mailam hun ah leng i tuaktou lai ding hi.
Tuni tan hiai hiipi vei khalou a i om Pathian kiang ah kipahthu gen in, ahong tung nailou thilte ah lunghimoh luat louh kisin ni. I Toupa Jesun, “noute lak ah lunghihmoh ziak a kua’n ahia amah dunglam tong khat a hihsang tuan thei?….A gam leh a diktatna tuh zong masa zaw un…Huchiin, a zing a ding lunghimoh kei un, a zing in amah a ding a kilunghimoh tawm ding ziak in. Nikhat a di’n ni khat gimthuak a hun hi” (Matt.6:25-34) achi hi. Zawlnei Jeremia in, “Toupa aw, ka hinna uh thununna leh, ka tunung ding ua thuneihna nei; kuamah ka om kei uh chih ka thei hi” (Jer.10:23) chi hi. A hong tung ding hunte ei khut a omlou ahihmanin Pathian khut ah koih in Amah muang lehang aman hon panpih ding hi.
I tanau-laina leh ilawm-ivual hiai hiipi neite ziak a lunggim leh thawmhau a i om khak leh hon hehpihtu Pathian om ahi chih thei ni. Pathian i muan louh ziak leh i ginna a hatlouh ziak a thawmhau ihikhol kei ding; Pathian in mihingte lauh theihna, lunghimoh theihna leh patauh theihna toh hon bawl ziak ahi. Hon bawltu Pathian in hon theichian mahmah a, huaiziakin “mangbat ni in hon sam le chin, k’on humbit ding a, huan nang n’on pahtawi ding hi” (Sam 50:15) chi hi. Nain khua a meithainu Toupa’n a hehpih dan i thei “…Toupa’n meithainu a muh tak in, a hehpih mahmah a, Kap ke’n, achi a” (Lk.7:11-13). A pasal om nawnlou, a tapa neihsun in sihsan; a dinmun haksatak ziak a kap amuh in Toupa’n hehpih mahmah hi. Mihingte lunggimna theisiam, hehpihtu Toupa ahi.
Coronavirus hiipi apan bitna hon pethei, damloute damna pe thei Pathian ahi chih thei ni. Coronavirus hiipi kia hilou, natna khempeuh damsak thei, misi hilhial leng kaithou thei Pathian ahi. Simon Peter’ zi’ nun (mother-in-law) khosik sangtak aneih lai in Jesu a chial ua, damna amu (Lk.4:38). Hiipi veite, dawi matte, mittawte (Lk.7:21), Numei kum 12 sipawt (Mk.5:24-34), Zeng natna (Mk.2:9-12), Phak natna (Lk.17:12-16) leh natna tuamtuam thuakte (Matt.9:35; Lk.4:40;7:21) Toupa’n hehpih in damna ana pe zel. Nain khua a meithainu a hehpih mahmah ziak in a sisa a tapa neihsun a kaithohsak hi, “Huan, a va naih a, lang a khoih a; huchiin, a zawngte a khawlta ua, huan, ‘Tangval, thou in, k’on chi,’ a chi a, misi tuh a tu khia a, a hong pauta a, Jesu’n a nu kiang ah a peta” (Lk.7:13-15). Damloute hihdam ding in leitung ah Jesu om nawn kei mahleh hon don in hon awlmoh gige hi. Hebru laikhak gelhtu in “Amah mah in bangchik mah in kon donlou kei ding a, pai leng kon paisan ngei kei ding achi ngal a” (Heb.13:5) chi’n na gelh hi.
Leitung a khosa lai ihihman in lungkhamna leh lunghimohna kipel theilou hi. Himahleh Pathian’ ta ten i tuahdan leh i phuutdan kisin theih om hi. Jesu’n “Nou semgim leh puakgik paw tengteng aw, ka kiang ah hong pai unla, kei man khawlna kon pe ding” (Matt.11:28) chi in lungkhamna thuakte khamuanna hon pia hi. Peter in, “Aman a hon limsak gige ziak in na mangbatna tengteng uh amah tung ah ngavek un” (1 Pet.5:6-7) chi a, Sam gelhtu in “Pathian i kihumbitna leh i hatna, mangbat lai a huh pahpahpa nai gige ahi” (Sam 46:1) chi hi. Kumpi David in, “Na puakgik Toupa tung ah nga le chin, huchiin ama’n nang a hon hihhat ding…” (Sam 55:22) chi hi. Sawltak Paul in, “Bangmahlou ah mangbang kei un; himahleh thil bangkim ah, thumna ngetna, kipahthugenna toh na ngetnate uh tuh Pathian kiang ah theihsak in om hen. Huchi’n Pathian muanna, lungsim himhim a theihzoh vuallouh in Khrist Jesu ah na lungtang uh leh na ngaihtuahnate uh a hon kep sak ngeingei ding hi” (Phil.4:6-7) chi hi.
Hon awlmoh a hon khotuah gige Jesu nei ihi chih mangngilh lou in Amah kiang tun le hang, i puakgikte pawzou ding in Aman hon panpih ding hi. I muan ngamna zahzah a muanhuai eite hon don gige i Toupa Jesu ahi.
Ka lunggim chian Jesu’n hon don hiam?
Kipaktak a la sa din,
Puakgik leh lungzinna’n hon don chiang in,
Ka lampi sau leh tawlhuai hi.
Hon awlmoh hon khotuah ka thei,
Ka dahna hon thuakpih hi;
Zan khosawt chimhuai leh,
Sun hun tawlhuai ah,
Ka hondam pan hon kem.
Hon ittu i Toupa Jesu aang a khamuanna nei nailou na hihleh Amah gingta in (Jn.3:16; Mk.16:16; Heb.11:6), Kisik inla (Nas.3:19; 17:30), Pathian tapa ahi chih kam a Gum in (Rom.10:9-10; Nas.8:36), na khelhnate ngaihdamna ding in Baptisma tang in (Nas.2:38; 22:16), huchiin Hotdam in na om ding a (Mk.16:16; 1 Pet.3:21), Khamuanna na nei ding hi (Jn.16:33).+++
Note: Hiai article pen Covid-19 hong kipattung lam April 19, 2020 a kigelh ahia, WhatsApp group leh mun tuamtuam ah leng kisuah ngeita hi – Admin