Abimelek in a unau sawmsagih a thah a, a pa tung a agamtat dan thu a a gitlouhna Pathian in huchibang in a thuk samta ahi: Huan, Sekem khuaa mite gitlouhna tengteng Pathian in a hon thuk samta hi: Huan, Jerubaal tapa Jotham hamsiat a tung uah a hong keta hi (Vai.9:56,57)
Hiai Vaihawmte 9 tuh khovel thilte kumpi a nei a, amaute a bitna zong khempeuhte a ding in vauhilhna (warning) poimoh tak ahi. Bung 8 ah mipi ten Gideon kumpi ding in bawl sawm mahle uh Gideon in pilsiam tak in a nial hi (8:23). Himahleh a bung tawpna lam i et leh kumpite mah bang in zi tampi hon nei a, huaite akipan tapa 70 hon nei a, a mei (concubine) akipan leng tapa hon nei in a min ding in Abimelech (kumpi tapa chihna) hon sa hi.
Bung 9 ah Abimelech in a pute khua Sekem mite kiang ah chialna (campaign) hon bawl in, “mi sawm sagih ten na tung ua vai a hawm uhia hoih na sak uh, mi khat in na tung ua vai a hawm?” achi hi (9:2). Baal biakna inn a sumte zang in mi hon guai a, a sanggamte lak a naupang pen Jotham chihlouh a sanggam dang teng hon thatsak vek a, huchiin amah kumpi ding in hon bawl uhi.
Huchiin Jotham tuh Gerazim tang ah hoh tou in Sekem mite kiang ah lingvom sing (breamble) gentehna thu hiai bang in hon gen hi. Singkungte (Sekemte etsakna) kuankhia in olive sing, theipi kung leh grape gui kiang ah ava hoh ua kumpi ding in ava chial uhi. Himahleh olive sing, theipi kung leh grape-te a ut kei ua, huchiin in lingvom sing kiang ah hoh in chialna ava bawl ua, lingvom in hiai bang in dawnna ana bawl hi:
“Na kumpipa ding ua thau hon nilh petmah na hih uh leh ka liim ah hon bu le uh chin a ke: na hih kei ule bel ling a mei hong pawt in Lebanon tang a sidar singte kang khinvek heh” (Vai.9:15).
Hiai lingvom sing gentehna in bang gen ahi dia? Olive sing, theipi kung leh grape gui-te a utlouh un mihoih Gideon-te kumpi ding a a utlouh uh a ensak hi; Pathian kia a kumpi uh ahihziak in. Himahleh lingvom sing in bel mihoihlou Abimelech a ensak hi. Abimelech kumpi ding a ahon bawl un mipi ten adeih uh amu mah uhi. Himahleh lingvom sing tuh sing keu, ling nei ahihziak in siatna chihlouh a dang bangmah a zatna ding a om kei hi. Hiai mah tuh Abimelech in Sekem mite tung a a thil hih mah ahi.
Lingvom in “Ka liim ah hong bu un” achih bang in tunin leng chialna tuamtuam i tuak sek hi. Pathian sang a khovel kumpi leh thilte kumpi a nei a bitna i zong chiang in buaina i tuak zaw sek hi. Pathian kia i kumpi ahi chih thei thak ni.
Unaute zingpha. Tuni hun zatnuam chiat