Huan, Saul in dawi aisansiam zawlte leh dawisiamte a gam a kipan in a delhkhe khin a… Huchi’n Saul in a sikhate kiang ah, Dawi aisansiam zawl numei a kiang a ka hoh a ka dot ding in hon zon khiak un, a chi a. Huan, a sikhate’n a kiang ah, Ngai in, Endor khua a dawi aisansiam numei om eive, a chi uh (1 Sam.28:3,7)
Saul om dan i et leh a thilhih leh nasepte kilehbulh gawp a bang hi. Dawi aisansiam zawlte leh dawisiamte a lalgam sung akipan delhkhia hinapi in, amah mah in amaute thudot nuam in a guk zon a, dawisiam numei khat panpihna ava guk nget maimah hi. Diklou, hoih lou chia a lalgam sung a om dia a deihlouhte mah amah mah in ava hih hi.
Hiai a Saul gamtat dan i et leh lepchiah huai ahihdan muh haksa hetlou a, himahleh ei hinkhua ah hiai bang lepchiahna omte mahni kimuh a haksa mahmah hi.
Diklou ahi, hoih lou ahi chia na gen a, midang na hilh sekte nang mah in na hih khak zel a om hia? Om tham ding in ka gingta hi. Thu nasemte, preacher khat ka hihna ah hiai bang lepchiahna ka hinkhua ah ka kimu kha sek hi. Hiai hun chiang in ka thugen lai a ka “aw” mahmah ka bil a hong ging hileh kilawm in ka hinkhua hon sukha sek hi.
Hiai bang a lepchiahna i hinkhua a aom khak chiang in bang chi’n i om dia?
- Kisik in (repent). I hih masak pen ding tuh Pathian mai a kisikna i neih ding ahi.
- Thum in (pray). Pathian zahngaihna ngen in a kiang ah thum in.
- Kipak in (Be thankful). Lepchiah tak a om khasek himahle hang, Pathian dohzohna leh ngaihdamna ziak in kipak ni.
Pa aw, na mai a lepchiah tak a ka om khak sek ziak un hon ngaidam inla, na zahngaihna ka tung uah om sak in.
Unaute zingpha. Tuni hun zatnuam chiat