Toupa’n hichi’n a chi: Lampite ah ding unla, en un, lampi hoih omna lampi luite tawn un, huai ah pai unla, na kha ua ding in khawlna na mu ding uh; amau bel, Huai ah ka pai kei ding uh a chi uhi (Jer.6:16).
Lampi hoih omna lampi luite tawn ding a kichial bang chihna ahi dia?
Lampi luite tawn dia chialna tuh Pathian thuneihna kivaihawmkhum sak dia chialna ahi. Mahni ut, deih leh deihlouhte koihkhia a, Pathian’ utna leh lampite zui dia kipiakkhiakna ahi hi.
Lampi luite tawn dia kichialna tuh Pathian deihna a om zou nawnlou, ana kisubuah gawpta ihi chih kipomna (acknowledgment) khat ahi. Khovel thilte ziak in i hinkhuate i na subuah gawpta ua, i kim leh kiang a-te mah bang in i om gawpta ua, khalam i bahlohta uhi.
Lampi luite tawn dia kichialna tuh i hih ngeina dante (traditionalism) mah hih dia kichialna toh kibanglou hi. Pharisaite tuh mihing thugousiah zuite (traditionalist) ahi ua, hih hoih a kisak lai un Pathian’ dan anial kha uhi. Jeremiah in amah hun a Israel-te ana chial mah bang in Jesu’n leng Pharisaite kiang ah mihing thupiakte tawpsan ding in ana gen hi.
Tuni a i tangteel a i muh bang in lampi hoih omna lampi luite tawn un, huai ah pai ni. I lak khat Khrist’ saptuam hong lut tuung lai a unaute khat leh khat i ki-awlmohnate, kihazatna omlou a i pankhawmnate, i tanau-lainate sang mah a i khalam unaute i ngaihzawkna leh awlmohzawknate, Pathian’ thutak i letkipnate, hiai thutak midangte kiang a gensawn ut a i tha itnate, biakna i ngaih poimoh dante, Laisianthou’ thu i theihdante uleh thil hoih tuamtuam i na hihsate i nutsiat tampi om khata ding hi.
Khrist’ saptuam thutak na zuih ut tung a na khalam dinmun toh tulel a na khalam dinmun bang chi na sa a? Pichin lam manoh hi in na kithei hia? Ahihkeileh a keniam lam? I lak a Khrist’ saptuam hong lut tung a midang ten Khrist’ saptuam a muh dan uleh tulel a i om dan ua Khrist’ saptuam a muh ding dan uh bang chi din na gingta a? Huaite sang a poimoh zaw lai Pathian in bang chi bang a mu din i gingta a?
I kha a ding a damna i muhna ding lampi hoih omna, lampi luite totkik poimoh in na ngaihtuah hia?
Unaute zingpha. Tuni hun zatnuam chiat.