TOUPA aw, ke’n zaw k’on sam a, ka thumna in zingsang in a hon don hi. TOUPA, bang achia ka hinna khahkhia na hia? Bang achia ka lak a na mai sel? Ka naupan chil a kipan gimthuak leh si dekdek in ka oma; na thil mulkimhuaite ka thuak in hih lungbuai in ka om hi: Na heh mahmahna in hon vuk mang a; na thil mulkimhuaite’n hon hihmangta a. Huaite’n nitum in tui bang in hon umsuak ua; ka kiim ka vel in hon um chiat uhi. Hon itpa leh ka lawm tuh hon gamlat in a omsakta a, ka mel theihnate mial ah na omsakta ahi (Sam 88:13-18).
Sam laibu ah lungkham tak a kahna late tuh kipahna leh phatna, Pathian in hunkhe ding ahihdan muanngamna in zui tangpi hi.
Himahleh tuni a i tangteel ah huchi hetlou hi. Hiai bung tuh Sam laibu a ding in lungkhamhuaina pen mun hi ding in gintakhuai hi. Tang khat akipan a tawp tan ah a gelhtu a beidot dan leh a lametna a bei dan muh theih hi.
Ahihhang in hiai akipan a gelhtu ginna tasam ahi chih theih tuanlou hi. Huainak sang in, “hon humbitpa Pathian” chi’n hon pan hi (v 1). A lungkhamna khokhuk akipan pawtkhiak ding dan theizou kei mahleh Pathian kia lou a honkhe thei omlou ahihdan a theichian hi. Huaiziak mah in thuum a; Pathian ah muanna a nei hi. A hinkhua mial mahleh Pathian a nuse kei hi. Pathian kiang ah kap khia (cries out) in (v 2), zingkal chiang in a hondam thei om sun kiang lam a entou hi (v 13).
Mi tamtak ten hiai bung simnuam in a deih mahmah uhi. Hinkhua ichih hiai dan mah ana hi lel hi. Khenchiang in i hinkhua a haksatna i tuahte aziak-asan leh a dawnna ding baihlam tak om hetlou hi. I lampi tot-te ah khovak muhphak ding omlou sek hi. Himahleh Pathian a om gige hi. I hinkhua bangchituk in mial mahleh i lunggimna bangbang toh i Pathian kiang ah chiklai peuh in i kapkhe thei hi.
Pa aw, ka lungkham uleh beidotnate uah na bil hon doh inla, na kiang a kong kahnate uh za in, ka poimohna bang un dawnna hon pia in!
Unaute zingpha. Tuni hun zatnuam chiat.