Kumsang Lalgam, Part -2 i gelhna ah Kilakna 20-na thu toh kisai unaute apan dotna leh kupbehna ka muhte akipan in Kumsang Lalgam, Part – 3 kon gelh beh a, ka gelh hun tan a dotna leh kupbehna om teng kon telsak vek hi.
Kilakna laibu toh kisai a lompi a gen in suutdan lianpipi thum in khen theih a, huaite tuh Preterist, Futurist leh Historical kichi hi. Premillennialist ichihte ngaihdan Futurist ahia, amau Kilakna laibu pen Jesu hong painawn ma deuh a thiltung dingte leh maban a thil hong tung tou zel dingte genna dan ngen in la ua, Kilakna 20 leng tunung chiang a Jesu’n leitung a kumsang lalgam hong phutkhe ding chih sinsakna dan in la uhi. Himahleh hiai sinsakna in Laisiangthou tampi kalh kha ahihdan leh lalgam pen phuhkhiak khit a omta ahihdan Part – 1 leh Part – 2 ah igenta hi.
Khrist lalgam leh Kumsang hun
Part – 2 ah Laisiangthou pansan in lalgam tuh saptuam ahihdan igen a, hiai tuh Khrist saptuam teng phial in igindan uleh isinsak dan uh ahi. Unau ten tunung chiang a kumsang lalgam phuhkhiak a hong om nawnlou ding ahihdan Laisianthou hon sinsakna kipom vek mahleh Kilakna 20 toh kisai bel suutdan leh theihdan kibang lou zekzek om tham hi. Tampi ten Kilakna 20 a kumsang vaihawmna kigen toh saptuam sung a Khrist in khristiante toh a vaihawmna kibang in agen ua, mimal ah hiai ngaihdan hun sawttak ka nei hi. Laisiangthou in Khristian te’n Khrist toh vaihawm khawm ihihdan (Rom.5:17; 2 Tim.2:11-12; Kil.5:9-10) leh a lalgam sung a kumpi siampute ihihdan hon hilh hi (1 Pet.2:9; Kol.1:13). Hiai ngaihdan tuh suutdan tuamtuam omte lak ah laktaak leh ngaihtuah tham ching mahmah khat ahi. Hiai dan ngaihdan i neih lehleng tunung chiang a Jesu’n kumsang lalgam hong phutkhe ding chih sinsakna a diklouh dan hon musak veve hi.
Himahleh Part – 2 a igelh mah bang in Kilakna 20 hoihtak a isim leh hiai mun a kumsang vaihawmna kigen pen leh Pentecost ni a phuhkhiak a om Khrist’ lalgam in kituamna zek nei bang hi. Aziak ahihleh Khrist’ lalgam pen Khrist a hong painawn chiang in Pa kiang ah piakkhiak in om ding a, huchi’n hun tawpna hita ding hi (1 Kor.15:23-34). Himahleh Kilakna 20 ah bel kumsang khat a bei chiang in hun tawpna hi nailou ding a, Setan hen a aomna akipan hun sawtlou chik khahkhiak a om in namte khem nawn ding hi (20:3,7-8). Huaiziak in Khrist’ lalgam leh Kilakna 20 a kumsang vaihawmna kigen pen in kituamna zek nei bang hi. A kituamna a chiansemna ding in hiai a nuai a thulute zang in i etbeh ding.
Setan Henna (20:1-3)
Part – 2 a igen bang in Laisiangthou ah Setan hen a omna thu mun thum ah kimu hi (Matt.12:28-29; Heb.2:14-15; Kil.20:1-3).
Kilakna 20 a Setan hen a omna ziak tuh “kumsang khat a beisiang mateng namte (nations) a khem nawnlouhna ding in” (Kil.20:3) chih ahi. Setan in nam tuamtuamte Roman lalgam a kigawmkhawm ding leh huai lalgam tungtawn a Pathian’ saptuamte subei ding in namte (khovel lalgamte) ana khem hi. Huaiziak in Pathian in kumsang khat sung namte thahatna zang a Pathian’ saptuam sawi thei nawnlou ding in hen hi. Hiai henna tuh Jesu Khrist a thohnawnna tungtawn a Setan hen a aomna (Heb.2:14-15; Matt.12:28-29, 1 Kor.10:13) hilou in Rome lalgam zang a khristiante a sawi bang a sawi thei nawnlou ding a henna ahi hi.
Part – 2 a igen bang in Kilakna 19 ah Rome lalgam beina thu imu hi. Rome lalgam a beina thu toh kizom in Kilakna 20 a Setan hen a omna thu hong kipan hi. Huaiziak in hiai a Setan hen a omna pen leng Rome lalgam bei akipan hi ding in ngaihtuah theih hi. Khovel khangthu ah tuni tan in Rome lalgam bang a lalgam tuamtuamte kigawmkhawm a Pathian’ saptuam sukbei sawmna muh ding om nai tadih lou hi.
Khrist toh kumsang vaihawm kuate ahia?
Setan kumsang khat hen a omna tuh Rome lalgam bei akipan ahi chih igenta a, hiai kumsang khat hen a om sung in Kil.20:4-6 kikal ah Khrist toh kumsang vaihawmna thu imu hi. Hiai hun a Khrist toh kumsang khat vai hawmkhawmte tuh “Jesu thu theihsakna ziak leh Pathian thu ziak a angawng uh sattan a omte khate (souls), gamsa leh a lim beloute, a tal ua leh a khut ua a chiamtehna neiloute” ahi uhi (Kil.20:4).
Khovel khangthu a imuh bang in kumzabi khatna beikuan lam in Rome kumpi Domitian in kumpi biakna (emperor worship) hon pankhia a, kumpite lim be utlou peuhmah naktak in hon sawi hi. Huaiziak in khristian tampi ten sawina hon tuak ua, Johan ngei leng sawi a om in “gimthuakna a na unau uleh na thuakpih uh ka hi” (1:9) chi hial hi.
Pergamos saptuam ah Antipas martar a thah a om thu imu hi: “Setan tenna mun a ka palai ginom, Antipas thah a aomlai in leng na ginna na tawpsan tuan kei hi” (Kil.2:13). Hichibang a Pathian’ thu ziak a thah a om kha (souls) ten Pathian kiang a asisan phuba uh bangchik chiang a la ding ahia chih ana dot lai un amau bang a thah a omlai dingte ana ngak zek ding a hilh in a om uhi (Kil.6:9-11). A ngetna uh Pathian in dawng ahi ding a Kilakna laibu gelhzoh nung kum 300 val zek in Rome lalgam tuh beisak in a omta hi. Amaute tuh Jesu’ thu theihsakna ziak leh Pathian thu ziak a angawng uh sattan a omte, gamsa leh a lim beloute, a tal ua leh a khut ua gamsa chiamtehna neiloute ahi uhi. Kilakna 20 a Khrist toh kumsang khat vaihawmte tuh amau’ khate ahia, huaiziak in Rome kumpite sawina nuai a martar a si-te’ khate (souls) ahi uh chih muhtheih hi.
Kumsang hun bang chik akipan ahia?
Kilakna 6:9-11 ah Martar te’n a lunggulh uh, amau sawite’ tung a Pathian in chik chiang a phuba la ding ahia chih ahihdan imu. Bung 18 ah Kizuaknu (Rome Khopi), gendan dang in Martar-te’ sisan luanna khopi tung a thutanna piak a om ahihdan muh theih hi. Bung 19 ah gamsa nihte (Rome lalgam leh zawlnei takloute) tung a thutanna imu hi. Bung 20 ah kumsang hun a hong kipat ding in saptuamte sawi a hih bei sawm Setan tuh kumsang khat sung hen a om ahihdan imu nawn hi. Setan hen a om sung a Khrist toh kumsang vaihawmte tuh Rome kumpite sawina ziak a martar-te’ khate (souls) ahi uh chih imu. Huaiziak in kumsang vaihawmna tuh Rome lalgam a bei toh kiton a kipan ahi chih muh theih hi. Alehlam ah Khrist lalgam (vaihawmna) tuh Jesu a thohnawn khit a van a apaitouh nung in Pentecost ni’n hong kipan hi (Nas.2:29-36).
Kumsang hun bang chik a bei ding ahia?
Kilakna 20:7-8 ah kumsang vaihawmna bei zoh chiang a Setan khahkhiak a om ding ahihdan leh namte khem nawn ding ahihdan imu hi:“Huan kumsang khat a bei chiang in, Setan a tanna in a kipan in khahkhiak in a om dia, leitung kil li a om namte khem ding in paikhe ding…” (Kil.20:7-8). Setan in namte khem a misiangthoute kidoupih a om lai in Setan leh a zawlnei takloute tuh zoh in om ding uh chih imu (Kil.20:9-10). Hiai thilte zoh in Kilakna 20:11-15 ah Thukhenna Nanungpen toh kisai gen in om hi. Hiai a kipan in kumsang hun pen Thukhenna Ni hong tunma bang tan hiam a bei ding ahihdan imu thei hi.
I gentaksa mah bang in Khrist lalgam tuh Nasepte 2 ah kipanta a, Khrist a hong painawn a mi tengteng thohnawnna a om khit chiang in Pa kiang ah piakkhiak in om ding a, huchiin beita ding hi (1 Kor.15:23-24). Himahleh kumsang hun bel Rome lalgam bei hun apan kipan in khovel tawpma bang tan hiam ah bei ding hi. Ahihleh kumsang hun beita ahi diam ahihkeileh om lai? Jesu hong painawn ding hun i theihlouh mah bang in Pathian lou ngal a thei ding omlou hi.
Thohnawnna masa bang ahia?
Kilakna 20:4-5 in hiai bang in gen hi: “…Jesu thu theihsakna ziak leh Pathian thu ziak a a ngawng uh sattan a omte kha ka mu a, huaite gamsa leh a lim beloute, a tal ua leh a khut ua a chiamtehna neiloute ahi ua; amau a hong hingta ua, Khrist toh kumsang khat vai a hawmta uhi. Hiai pen thohnawnna masapen ahi. Misi dangte bel kumsang khat a bei mateng a hingkik kei uhi”. Martar-te’ vualzohna tuh thohnawnna masa ahi chih imu thei hi. I theihsa bang in Kilakna laibu tuh khristian-te hinsan (cause), Pathian thutak sukbei a om mai ding dinmun a akilat laitak a gelh ahi. Himahleh Pathian’ saptuam sukbei a omlou in, a sawitute suk chimit in a om zaw uhi. Hiai mah tuh Martar ten a hinsan uh ahia, huaiziak in Martar-te’ vualzohna pen thohnawnna bang a gen in a om hi.
Thukhunlui laibute ah hiai bang etsakna kampau zat in ana om sek hi. Babylon saltanna a Juda-te a om sung un a sisa guhkeu (dry bones) bang a gen in a om ua, himahleh a saltanna ua kipan ahong kiknawn un Pathian in, “Na hante uh ka hong ding a, ka hon kaithou nawn ding” (Ezek.37:10-14) chi’n gen hi. Zawlnei Isai in hiai thu agenna ah hichiin gen hi: “Na misite a hing nawn ding ua; ka mi luangte a thou nawn ding uh” (Isa.26:19). A taktak a taksa a a thohnawnna ding uh gen hilou in etsakna kampau ahi chih itheithei hi. Huaiziak in hiai a thohnawnna masa kigen leng a taktak a taksa thohnawnna gen hilou in, etsakna kampau a Marter-te’ hinsan, Pathian thutak vualzohna gen ahi zaw hi.
Kilakna 20:6 in “Thohnawnna masapen a pangte a hampha uhi, a siangthou uhi: Amaute tung a sih nihna in hihtheih a neih louh ziak in; himahleh amau Pathian leh Khrist siampute a hong hi ding ua, kumsang khat sung amah toh vai a hawm ding uhi” chi hi. Sih nihna toh kisai Kilakna 21:8 in hiai bang in gen hi: “dawilokte leh gingtaloute leh, kihhuaite leh tualthatte leh, mingaihhatte leh bumhatte leh, milimbete leh zuautheite tengteng tan tuh dil, mei leh kat a kang, sih nihna ahi” chi hi. Huaiziak in thohnawnna masa a pang Marter-te’ khate bel Pathian’ thu theihpihna ziak a sikhinta ahih man un sihna nihna (meidil) in a tung uah hihtheih bangmah nei nawnlou hi.
Thohnawnna masa toh kisai in unau khenkhat ten khalam thohnawnna, baptisma gen ahi achi ua, ngaihtuah tham ching mahmah ngaihdan ahi. Himahleh Premillennialist ten taksa a thohnawnna gen ahi achih ubel diklou hi.
Thukhitna:
Jesu Khrist in a hong painawn chiang a lalgam tungkhe dia hong pai ding ahihlouh dan Part-1 leh Part-2 ah chiangtak in igelhta hi. Laisiangthou in a lalgam sung a vai hawm lel ahihdan leh a hong pain awn chiang a a vaihawmna lalgam pen Pa kiang a pekik ding ahihdan hon sinsak zaw hi (1 Kor.15:23-24). Huaiziak in maban a kumsang lalgam om ding chih sinsakna tuh Laisiangthou toh a kituak kei hi. Premillennialist ten Kilakna 20 in sinsak ahi chi mah le uh sinsak khalou ahi chih ithei a; Khrist lalgam leh Kilakna 20 a kumsang hun kigen in leng kibatlouhna nei ahihdan itheithei zaw hi.
Tulel a Jesu Khrist vaihawmna lalgam mi-leh-sa hih na ut a, amah toh vai hawmkhawm hih na ut leh Amah gingta in (Jn.3:16; Mk.16:16; Heb.11:6), Kisik inla (Nas.3:19; 17:30), Pathian’ tapa ahi chih kam a Gum in (Rom.10:9-10; Nas.8:36), na khelhnate ngaihdamna ding in Baptisma tang in (Nas.2:38; 22:16), huchiin Hotdam in na om ding a (Mk.16:16; 1 Pet.3:21), a lalgam mi na hi ding hi (Kol.1:13).+++
A malam na simnuam leh click in: Part-1, Part-2
++++++++++++++++++++++++++++++
Laibu Et Khenkhatte:
- Harkrider, Robert. Classic Truth Commentaries: The Book of Revelation. Athens: Gurdian of Truth Foundation, 2008
- Hailey, Homer. Revelation: An Introduction and Commentary. Grand Rapids: Baker Book House, 1979.
- Hinds, John T. Gospel Advocate Series: A Commentary on the Book of Revelation. Nashville: Gospel Advocate Company, 1937.
- Jenkins, Ferrell. The Old Testament in the Book of Revelation. Marion, IN: Cogdill Foundation Publications, 1972.
- Wallace, Foy E., Jr. The Book of Revelation. Nashville: Foy E. Wallace, Jr. Publications, 1966.
- Ogden, Arthur M. Will Christ Reign For 1000 Years On The Earth? Guardian of Truth XXVI: 2, pp. 21-23
- Buttrey II, John M. The Book of Revelation: A Brief Commentary and Study Guide, 2005
- Floral Height Church of Christ, Outline of the Book of Revelation
- Padfield, David. Premillennialism Debate Chart, www.padfield.com
- Lockhart, Jay. The Mellennial, 1 & 2 Truth for Today, 1989, 2003
- Jackson, Wayne. Examining Premillennialism, www.christiancourier.com