Gam a mipite’n nuaisiah a ching ua, loh a hat ua, ahi, mi genthei leh tasamte a mawk bawl ua, diklou tak in mikhualte a nuaisiah nak uhi. Gam ka hih siatlouhna ding in a lak ua dai kai ding leh gam hum a ka ma a pang ding mi ka zong a, lah ka mu kei hi (Ezek.22:29,30).
Vualphaloute hiam, migentheite hiam nuaisiah leh khelbawl tak a ahatzaw leh neizawte’n a bawlna uh i muh chiang in hehpihna kinei hi. Khelbawltu leh bawlsetute iplahna kinei in, amau leng huai dan a bawl in om uhenla, hiai dan mite gawtmun tung le uh chih uthuai sek hi.
Hiai tuh hon bawltu Pathian i sutna khat ahi. Pathian in kinuaisiahnate, midik diklou tak a bawlnate ngai theilou in hua a, khelhna huat chihtak in hua hi.
Ei mihingte sang mah in khelbawlna, nuaisiahna leh khelhna Pathian in haw (hates) zaw hi. Ei leng mikhial leh a bukimlou mah i hihziak in khelhnate ngaihzam awl kisa zaw hi. Himahleh Pathian bel khelhna neilou, vak ahihziak in mial toh kituak theilou hi.
Pathian’ tate, amah hihna kikoppih khristiante i hih ziak in dikloutak a kibawlsiatnate huat dan leh Pathian etdan a khelhna et theih kisin poimoh gige hi.
Pa aw, khelhna ka hua uh. Nang huat bang a haw thei ding in hon panpih in. Na mit a muh bangbang a kou leng khelhna ka muh sam theih ua, ka hinkhua ua kipan ka paihkhiak theihna ding un hon panpih in.
Unaute Toupa’ ni zingpha🙋‍♂️. Tuni kikhop nuam chiat.