Huan, Kaisaria khua ah mi khat a min Kornelia a om a; Itali pawl a chih uh, huai pawl a sepaih zaheutupa ahi a, Pathian limsakmi ahi a, a innkuanpihte tengteng toh Pathian laudan a siam uhi, mite kiang ah thil tampi a pe zel a, Pathian kiang ah leng a thum gige hi (Nas.10:1,2)
Tuni i tangteel a Kornelia tanchin akipan i ziltheih point 2 poimoh mahmah om hi.
Khatna ah, Kornelia’ khalam dinmun i et leh Pathian limsakmi, amah kia leng hilou a inkuanpihte tengteng toh Pathian laudan siam, mite kiang a thilpiak tampi pe zel, Pathian kiang a thum gige mi ahi chih i mu thei hi. Mihing etdan ah hiai bang hinkhua nei tuh piangthak diktak, hotdamta ahi kei ding chih ngamhuailou a bang hi. Himahleh Pathian in Peter a sapsakna ziak tuh hotdam a hih theihna ding ahihdan hon gen hi: “Ama’n (Peter) thu a hon hilh ding a, huai mi thu in nang leh na inkuanpihte hotdam in na om ding uh” (Nas.11:14). Jesu Khrist thupiak bang a hotdamna dia baptisma tang nailou ahihziak in Pathian ngaih in hotdam, piangthak ana hilou hi cf.Mk.16;16). Peter in Pathian thupiak bang in thu a hon hilh ngei a, huchiin in baptisma hong tang uhi (Nas.10:48). Hiai baptisma tuh Pentescost ni a Peter mahmah in Khasiangthou’ pina a khelh ngaihdamna tan ding ahihdan a puankhiak ana hi hi (Nas.2;38). Baptisma tuh hotdam hih ziak a tan ding hilou in, hotdam hihtheihna ding a khelh ngaihdamna ding a tan ding ana hi zaw hi (1 Pet.3:21). Hiai mah tuh Sawltak Paul leng ana tanna san ahi zaw hi (Nas.9:18; 22:16).
Nihna ah, atangpi in mihing te’n mi hausa leh khovel a dinmun sang deuh neite diktatlou deuh, Pathian thu leng awilou deuh; mizawng leh gentheite Pathian in it a deihsak tuam deuh dan in ngaihdan kinei hi. Himahleh hiai ngaihdan dikkim hetlou hi. Pathian’ mi ginom leh makai thupi taktak Joseph, Daniel leh Ezekiel ichihte leng ginglou kumpite nuai a dinmun sangtak neite ana hi uh. Khovel a dinmun lian leh sangtak nei ten Pathian’ thu zui a, Amah adia hong kizat chiang un ginglou mite lak ah leng midangte sang mah in mite thuzohtheihna (influence) nei hoih zaw uhi. Hiaiziak leng ahi ding Khasiangthou pina a Thukhunthak gelhtu ten Ethiopia kumpi Kanda nuai a mi chilgeh laltak leh tuni a i tangteel sepaih za heutu pianthakna bang chiangtak in hon gelh se uhi. Huaiziak in dinmun sangtak nei khristian-te bang Pathian a ding in saptuam sung ah hong kizang tam le uh taksa leh khalam ah masawnna thupitak om ding hi.
Unaute zingpha. Tuni hun zatnuam chiat.