Huchi’n, hichi hihen, nungak kuapeuh kiang a, hehpihtak in ka dawn ding in na tui bel niamsak dih ve, ka chih a, huan, aman, Dawn in, na sangawngsaute leng dawn ding ka pe ding, chi peuhmah, huai mi ngei na sikha Isaak a ding a na mi seh hihen; huan huai ah ka pu tung ah hehpihna na langsak chih ka thei ding hi, a chi hi (Gen.24:14)
Abraham’ sikha pan Isaak zi ding a zon in Pathian ah panpihna ngen in a thum masa hi. Hiai tuh zi leh pasal kizonna ding a poimoh masa penpen, khristiante zuih ding a hoih mahmah thil ahi. Pathian apan chetna a nget amah leh a sangawngsaute teng tui dawn di piak kichi thu namai hi hetlou ding hi. Sagawngsau khat in gallon 30 (litre 135 vel) bang dawn zou a, sangawngsau 10, vangik pua a kilometre 800 val paite dawn ding tui mahni tha puak kichi thilbaih hi hetlou ding hi. Himahleh Rebekah in hiaite tengteng thanuam tak in zou hi. Abraham’ sikhapa a ding in hiai bang a zindou siamna amuh in apu Abraham in Angel-te siamtak a azindou khak dan a mitkha ah dawkpah thei ding in gintakhuai hi (Gen.18:1-8).
Koppih i kizonna ah Pathian kiang a ngen masa in Khrist batna neite mah tel in nei thei lehang lamzanhuai ding in gintakhuai hi.
Unaute zingpha. Tuni hun zatnuam chiat.