Ka khe a teu (slips) a, ka chih in, aw TOUPA, na chitna in a hon kai hi (Sam 94:18).
Naungek, pai kisin panpan ihih lai in kipuk ding a hon theih chiang un nu-leh-pate’n kintak in i ban ah hon len in hon pomtou sek ua, kipuklou in i om sek hi.
Hiai bang dan in i hinkhua a tamveitak kipuk ding lai Pathian in honna len in hon kaithou sek hi. I hinkhua ah thupukna hoihlou pipi i bawl kha sek a, himahleh hun tamtak ah Pathian in agu (consequences) hon thuaksak lou hi. I thilhih bangbang a thuak ding hile hang, kithoukik zou nawnlou a i kipukna ding tam mahmah ding hi. Himahleh Pathian in hon hehpih a, i kipuklouhna ding in honna lenpah sek hi.
Sawltak Peter in hiai a thei hoih mahmah hi. Ngaihtuahna nei manlou, kithalawp luat ziak leh a pilvan zohlouh ziak in tamtak ah ana kitotah kha sek hi. Sawltak dangte sang mah in leng a kitotah mun pen a bang hi. Himahleh Pathian in ana kaithou zelzel hi.
Huaiziak ahi ding a laikhak ah hichiin na gelh hi: “Huan hehpihna tengteng Pathian, a tangtawn thupina tang ding a Khrist a nou honsampa ngei in, sawtloukal na thuak nung un a hoih bukim a honbawl in (restore and establish), hon hihkip in (confirm), a hon hihhat (strengthen) ding hi. Amah kiang ah vaihawmna tangtawn in om hen, Amen” (1 Pet.5:10,11).
Unaute zingpha. Tuni hun zatnuam chiat.