Suang tang in ka hate leng a kitamsak a, vut in a hon tuam hi. Muanna a kipan gamlapi ah ka kha na suan a; kipahna (happiness -ESV) bang ahia chih ka mangngilhta (Kah.3:16,17).
Mihingte’n khenchiang in hun haksapipi, kipahna mawngmawng om thei nawnlou khop a lungkhamna i tuah hun om thei hi. Hiaite tuh khenkhat hun paisate a i hihkhelhna gah bang, ei toh kisai kha midangte ziak bang, ahihkeileh bukimlouhna khovel a khosa ihih ziak bang hi sek hi. Thawmhauna, hehna, thangpaihna, mahni leh mahni ningkitelna ten hon tuam khum chiang in kipahna bang ahia chih leng thei zou nawnlou khop in ki-om thei hi.
Himahleh tuni a i tangteel gelhtu Pathian’ zawlnei akipan hichibang hun haksapen hun a leng deihtel theihna neilai i hihdan a ban i simsuk leh muh theih hi. “Ka lungsim ah hiai ka thei thak a...” (Kah.3:21 – but I call this to my mind – ESV) chi’n Pathian lam a lungsim pia (focus) in a lametna a kipia hi. Pathian lam naih teitei ding a mahni kithuzoh (choice) tuh thilnuam ahi het kei hi. Pathian i naih teiteina in i lungkhamna leh haksatna teng a lakhe tuan khol kei maithei, himahleh hiai deihtelna in a hon hunkhia (save) hi.
Pa aw, ka hun haksa tawp uh, lametna leng omlou hi a ka theih hun un leng nang om lai na hi chih ka theih ua, nang naih ding a deihtelna ka bawl theihna ding un hon panpih in.
Unaute Toupa’ ni zingpha. Tuni kikhop nuam chiat.