Huan, Aron tapa nihte’n TOUPA a va naih ua a sihloh nung un Toupa’n Mosi a houpih a; Toupa’n Mosi kiang ah, Na unau Aron houpih inla, puanzak sung mun siangthou ah, bawm tung a chitna tutphah ma ah chiklai in leng honglut hetkei heh, a si kha ding hi; chitna tutphah tung ah, mei in ka hong kihil sin ahi (Lev.16:1,2)
Kilemna ni (Day of Atonement) tuh kum khat a khat vei thiltung, siampu lianpen Aron in amah khelhna, siampu dangte khelhna leh Israel mipite khelhna thupha tawi a, mun siangthou pen alut a kithoihna a bawl hun ahi. Tuni a i tangteel leh Leviticus 16 pumpi a kigen tuh hiai Kilemna ni a Aron thilhih ding leh kithoihna lat ding dan thupiakte ahi hi.
Hiai ni’n Aron lungsim ah thanopna, kipahna leh lauhna khat om ding in gintakhuai hi. Toupa mai a ding diing ahihna ah kong khat ah kipahna nei diing a, a lehlam ah a deihlouh dan a om khak theih ahihna ah lauhna khat nei veve diing in gintakhuai hi. A tate nih Nadad leh Abihu in Pathian thupiaklouh mei a zat ziak ua, Pathian be ding a kisa hinapi a a sihloh thute uh hun sawt pai nailou ahihna ah a ngaihtuahna ah om tham ding hi.
Aron in lau leh ling kawm a hiai hun a Pathian a naih dan leh tuhun a khristian-te dinmun enkak lehang, en bel hangsan tak in hehpihna mangtutphah i naih thei hi (Heb.4:16). Hiai tuh i siampu lianpen i Toupa Jesu, Pathian’ taklam a tu a hon gensaktu i neih ziak ahi hi (Heb 1:3; 2:17; 4:14; 6:19; 9:24). Amah tuh i kilemna, khelhna tengteng a ding a khat vei set det ding a lat ahita hi (Rom. 3:25; Heb. 9:11-14, 25-26; 10:19-22).
Unaute zingpha. Tuni hun zatnuam chiat.