“Pathian i kihumbitna leh i hatna, mangbat lai a huh pahpahpa nai gige ahi” (Sam 46:1)
Coronavirus (Covid-19) hiipi bang hial a khovel in a buaipih, mihingte lungsim leh ngaihtuahna luahzou I theih phak tan uah om ding in gintakhuai lou hi. SARS leh MERS kichi leh hiipi tuamtuam khovel ah ana om ngei thamta a, himahleh Covid-19 bang hial a khovel mun tuamtuam a om Pathian biakkhawmna munte a kikhak lam theihkhak in omlou hi. 9/11 leh 2004 kum a Tsunami hunte ah leng khovel khosakna leh kisumdawng tuahnate ngeina bang a pai in sukbuai in ana omlou hi.
Hiai bang hun ah imaban hong paitouh zel ding dan theihzoh hi kei mahle thil khat bel a chiang mahmah om hi. Lei leh van bawltu Pathian mah tuni in leng Pathian hilai hi. Amah muang mite hunkhe zelzel Pathian ahi.
Tulel in ngeina banglou in kikawmtuahna rail leh lennate khawlsak in om a, ni 31 sung hial bang kikulkhum in I omta uhi. Hiai bang hun lamdang leh haksa ah Sam 46 apan thupi thum lakhia in kihasuan leng ichi hi.
Pathian muanngamna (1-3)
Sam 46:1-3 I sim leh Pathian muantak ahihdan muh theih hi. Hun haksa, hun lauhuai leh hun tawlhuai I tuah hun a ikihumbitna leh hatna Pathian ahi. A mite mangbat hun chiang a gamlat san mai lou a huh pahpah nai gige Pathian ahi. Lungmuan huai hina tel e maw! Huh zeuhzeuh Pathian, hun tamzaw a huh zelzel Pathian chih hilou a, huh gige Pathian ahi. Hun a haksat zoh peuh leh amah nai semsem zomah hi.
Hiai bang Pathian neite ihihman in lungkham in mangbang het kei ni. Amah muangngam in naih peuh le hang aman hon naih ding hi (Jak.4:8). Khovel mi ten bel a lauh ding mah uh ahi. A kingakna uh khovel thilte, a lametna khel ua sawiling a om hiven. Himahleh en bel khovel thilte ah kinga zaw lou in; lei leh van bawltu, a mite humbit zel I biak Pathian ah ikinga zaw ding uhi.
Pathian a kinga ding I chih chiang in pilvang lou tak in I hai gamtat ding uh I chihna ahi kei. Kiven theihna ding a Pathian in pilna hon piak pen I zatsiam ding ahi zaw. Himahleh hiai ten hon humbit ding chih tan lel a muanna koihlou in Pathian ah muanna I koih zaw ding uhi. Amah ah kinga in muangngam peuh le hang aman hon zuausan lou ding hi.
Tang 2 leh 3 isim leh Sam gelhtu in kihumbitna Pathian nei ahihman in leitung hong kidang in, mualte tuipi sung pek ah kisuan mahleh laulou ding ahihdan imu. Gen.1:9 I sim leh leikeu, mual leh tangte tuipi toh Pathian in a bawlkhiak ahi chih imu. Leitung kisegawp in mual leh tangte bawlkhiak ahihma bang hial in om mahle uh humbittu Pathian nei ahihman in laulou hi. Huai mai kia hilou in mualte ling duamduam mah leh lau tuanlou ding ahihdan imu. Hiai tuh mangbatna tawpkhawk hun genna ahi. Amah muang a mite humbit zel Pathian in mangbatna tawpkhawk a leng humbit ding ahi chih a theichian mahmah hi. Hiai Pathian mah tuni a eite Pathian ahi chih mangngilh kei ni. A hon humbit theihna ding in amah I muangngam na hiam unaute? I Pathian zaw hon panpih ding a nai gige ahi.
Pathian ompihna (4-7)
Sam 46:4-7 ah a gelhtu in Pathian omna khopi a hinkhua a nop dan hon gen hi. Lui khat a om a, huai lui kate’n Pathian khopi a kipak sak, tungnungpen omna mun siangthou tak, Pathian a laitak a aom ziak in a ling kei ding achi hi. Namte, gamte ling mahle uh Pathian omna khopi bel a bit ding hi. Zan lauhhuai hun leh hun haksate tuak mahleh Pathian panpihna hong tung zel ding ahi chi hi.
Thukhunlui hun in biakbuk ah Pathian a om chih I theih. Himahleh Thukhunthak ah Laisiangthou in “Eite zaw Pathian hing temple i hi uh” (2 Kor.6:16) achi hi. Pathian’ kha omna, a tenna ihi unaute. Huaiziak in khovel ah bang chibang hiipi leng in khovel buai mahle I lau in I patau kei ding uhi.
Pathian mi ten hun haksa leh sawina thupitak a tuah lai un leng saptuamte lak ah I Toupa Jesu a om gige chih ithei (Kil.1:13 cf 1:20). Huai Pathian mah tuni a eite lak a om Pathian ahi. Khovel mite bang a hon humbit a hon ompihtu ding neilou ihi kei a; nei ihihlam I theih khaklouh a I kisukpatauh khak ding lauhuai zaw hi.
Pathian ahi chih theihna ding (8-11)
Sam 46:8-11 ah Sam gelhtu in khovel thilte kia en a, huaite a kinga a muanna koih mailou a, Pathian lam thilte en zaw ding in hon hasuan hi. Mi ten Pathian ahihna atheih ua, pahtawina a piak uh I Pathian deihdan ahi.
Hiai Sam 46 hun in Pathian mi ten a melmate ua pan douna a tuak lel uh. Himahleh Pathian in a mite humbit a, melmate uh zousak lou ding ahihdan imu. Pathian in kidounate tawpsak a, thalpeu hihtan a, teite sattan a, kangtalaite mei ah a haltum ding ahi chi hi. Hiai vualzohna in mite lak a Pathian ahihna puangzak ding ahihdan imu hi.
Hun tamzaw ah buaina leh haksaknate ah hun tam I piak luat ziak in hon humbit theitu Pathian ahihlam kiphawk khalou sek hi. Khovel tung a thunei, lei leh van bawltu Pathian phalna lou a thiltung khat lel leng omlou ahi unaute. Pathian’ melma Setan nangawn in leng Pathian phalna leh theihpihna tellou a na khat lel leng sem theilou ahihdan Job hinkhua ah imu. Tua I tuah lel Coronavirus hiipi tung a thunei I biak Pathian ahi unaute. Pathian’ ta tamtak ten hiai hiipi apan hon humbittu ding Pathian a ding a hun piak sang mah in a natna ah lungsim leh tha tam I seng zaw kha ding uh chih a lauhuai unaute.
Khovel gam tuamtuamte, abik in khovel teng in a kineppih leh a kingakna gam khangtou zaw America leh Europe gam ten eisang mah thuak nasa zaw lai uhi. Hiai in khovel mihingte hihtheihna bangmah ahihlouh dan hon langsak hi. Pathian mah sam in, Pathian mah bel in, Pathian a ding mah in ngaihtuahna leh hun pia in, lungsim leh tha tam seng zaw le I dam zaw ding uh.
Coronavirus hiipi sang in Pathian neilou a hinkhua I zat khak ding lauhuai zaw hi. Hiai hiipi in a setawp in leitung damsung tan lel hon subuai zou ding a, himahleh Pathian neihlouh in bel tangtawn, tangtawn in haksatna hon tun thei hi.+++
Note: Hiai article pen Covid-19 hong kipat chiil March 31, 2020 a kihanthawnna dia kigelh ahia, WhatsApp leh mun tuamtuam ah leng kisuah ngeita hi