Huan, Toupa’n Mosi a houpih a, Israel suante houpih inla, a kiang uah, Jordan lui na galkah ua Kanaan gam na lut chiang un kihumbitna khua ding khua na seh ding uh ahi, tualthat kha mi taina ding in (Nam.35:9-11).
- Thukhun Lui a kihumbitna khua (cities of refuge) leh Jesu Khrist in kibatna bangzah hiam a nei hi.Kihumbitna khopi tuh Israel mi ten baihlam tak a anaih theihna ding uh hisap a kibawl ahi (Deut.19:1-3). Israel gam a teng Israel mi leh gamdang mite kihumbitna ding a bawl ahi (Nam.35:15). Huchimah bang in Khrist a kihumbitna leng a ut peuh in baihlam tak in naih thei gige hi (Jn.3:16).
- Khopi a abit theihna ding in mahni vo tailut ngai hi (35:11). Jesu’n leng a kiang zuan ding in thagum in kuamah samlou a, it tak in hon sam zaw a, en i zot ngai hi (Matt.11:28).
- Khopite tuh sihna akipan i kihumbitna ding ahi uh (35:12). Jesu leng khalam sihna akipan hon humbit dia hong pai ahi (Rom.6:23).
A kibatna uh om mahleh a kibat hetlouhna uh khat om hi. Kihumbitna khopi tuh tupmawng hilou a mi that khate a ding ahia, tup mawng a tualthat mi a ding ahi kei hi. Tupmawng a tualthat mi bel thah ngeingei chih thupiak ahi (35:20-21).
Alehlam ah, Jesu Khrist ah bel tualthat mi hi in bang chibang khelhna neite a ding in leng kihumbitna om hi (Nas.2:23, 38;3:15,19).
Pa aw, tapa Jesu Khrist a ka bit theihna ding uh lampi non bawlsak ziak in ka kipak uhi.
Unaute zingpha. Tuni hun zatnuam chiat