Lungtang bel thil tengteng sa’ng in khemhat pen, hoihlou pumlum ahi a; kua’n ahia theithei ding? (Jer.17:9).
Mihingte’n i emotion (lungsim phur dan) dungzui in thupukna kibawl kha tangpi hi. Advertisement bawltu ten hiai a thei mahmah ua, huaiziak in mite lungsim (emotion) la theithei ding in advertisement a bawl uhi. A van zuakte uh a hoihna leh hoihlouhnate diktak gensang in mite lungsim la zual thei ding in a bawl zaw sek uhi.
Taksa thil kia hilou in khalam ah leng tampite’n emotion dungzui in adik leh diklou a khensat sek uhi. Mahni hoihsak dan, phur dan leh nopsak dan ahihleh dik mai ding in a koih ua; Pathian in leng pompih mai ding in a ngaihtuah uhi.
Himahleh Laisiangthou in mun tamtak ah mahni ngaihtuahna kimuanpih ding ahihlouh dan vauhilhna honna pia hi. Zawlnei Jeremiah in, “Aw TOUPA, mihing omdan bel, amah thu lel ahi kei chih ka theita hi: a tung a pai mihing ah, a pheikhai pi ding a om kei hi” ana chi hi (Jer.10:23). Solomon in, “Na lungtang tengteng toh Toupa ah muang inla, nangmah theihsiam na ah kinga ke’n” (Pau.3:5); “Mihing a dia lampi dik a kilawm a om a, himahleh huai tawpna sihna lampite ahi” (Pau.14:12) ana chi hi.
Tuni a i tangteel in lungtang bel thil tengteng sang in khemhat pen ahi achih mah bang in, mahni kikhem a adik leh adiklou mahni lungsim utdan leh hoihsak dan a khensat mailou a, Pathian’ thu, Laisiangthou bang chi’n agen a chih a khensat zaw ding in kisa ni.
Unaute Toupa’ ni zingpha. Tuni kikhop nuam chiat.