Bang ding a mihing, a khelhna gawtna a ding a mi phun ahia? I lampite zong in enchian ni, TOUPA lam ah kik nawn ni (Kah.3:39,40).
Mi’n a hihkhelh gah (consequences) thuak ding omte thuak taak (deserve) mah ka hi a kichih theihna tuh khalam piching ahih chiamtehna khat ahi. David in Bathsheba toh a khelh zoh in Pathian kiang ah hichiin thum hi: “Nang tung ah, nang tung mahmah ah thil ka hihkhial a, hiai thil gilou nang mitmuh mahmah in ka hih hi; huchi a na hong paukhiak chiang a na diktat a, vai na hawm chiang a gensiatbei na hih theihna ding in (Sam 51:4 – Parallel Bible).
Pathian in a khelhna ngaidam mahleh agu (consequences) a om veve a, a nasa (severe) mahmah hi. A insung temsau in a nuse kei hi. Ahihhang in a phun (complain) het kei hi. Gawt taak mah ahi chih a kithei a, huaiziak in Pathian’ vaihawmna (judgment) tuh adik chih a pom hi.
I khelhna ngaihdam i nget leh Amah tuh hon ngaidam ding in a muanhuai in a diktat hi (1 Jn.1:9). Himahleh i tung ah David bang a hon sawina om thei veve hi. Hichibang sawina om hun ah tuni i tangteel a i muh bang in phunlou a, Pathian nuaksan lou a, i lampite enchian thak a, amah lam naih semsemna a zang zaw ding in hon deih hi. Tua bang a i khelhna gah i pom chiang in, i mohpuakna pom ihi chih Pathian i lak a, huchiin i thilhihte a ngaikhawkhuaina leh athupina (gravity and seriousness) i pom thei ding hi.
Pa aw, na mai a kiniamkhiak a; nang kalh a ka gamtat khakna ziak ua non thuaksakte thuakzou thei ding in hatna hon pia in.
Unaute zingpha. Tuni hun zatnuam chiat.