Huchi’n Israel suante kiang ah a va gam etkhiak uh, Gam enkhe ding a ka va vakna uh, a sung a mi tengte nekkhit hatmi ahi ua; huan, a mi om ka muhte uh mi awmkhauh pipi ahi uh. Huan, huai ah Anak suante, mi liante, awmkhauh pipi ka vamu uh; khaupe bang lel in ka kimu ua, amau leng khaupe ek bang lel in a hon mu uh, chi’n a hoihlou lam in a gen uh (Nam.13:32,33)
Pharo sepaihte lak akipan humbit a, Tuipi San kansak Pathian ahi chih thei in, kipahna la Israel mipi’n hichiin hon sa uhi: “Toupa ka hatna leh hotdamna hong hi, Toupa galhatpa ahi, a thilhihtheihna, thupina leh siangthounate ziak in Philistia, Edom, Moab leh Kanaan mite ling in a zulmamgta uh” chi’n la in hon sa hial uhi (Exo.13:1-3, 6,7,11,14,15). Himahleh tuni a i tangteel a imuh bang in gam enkhe ding a ava kuan un amaute pitu Pathian hatna leh thilhihtheihna enkha nawnlou melmate hatna leh lauhhuaina kia hon enkha uhi. Hiaiziak in alak uah lungkiatna thupitak a tun hi.
Hun tamtak ah khristian ten leng Pathian enkha lou in khovel haksatna tuamtuamte kia en in, lungkiatna i nei khasek hi. Hiai in i haksatnate mai ah khaupe bang mai in hon kimusak a, amau leng huai bang mah a hon mu in hon ngapthoh khasek uhi. Huaiziak in Pathian hatna leh thilhihtheihna lam enthak in mitsuan thak lehang, i haksatna tuamtuamte akipan vualzohna i ngah ngei ding hi.
Unaute zingpha. Tuni hun zatnuam chiat