TOUPA Pathian aw, na sikha kiang ah na thupidan leh na khut hat tak na kilang sak ahi peuhmah ngei a; van ah hiam, lei ah hiam na thil hih bang leh na thil hih thupi tak bang hih thei pathian kua a om a? Hon galkah sak inla, Jordan gal a gam hoihtak, huai tang kilawm tak leh Lebanon hon mu sak dih ve, chi’n (Deut.3:24,25)
I tangteel tuh Mosi in Kanaan gam lut nuam mahmah a Pathian kiang a angetna ahi. Israel mipi makaih a, kum 40 lam a thuakgimna gah muh ding om hetlou a bang hi. Mihing ngaihtuahna ah tuh a lohsuah om sun phunkhumna, gensiatna, langbawlna leh nuaisiahna khawng lel a bang hi. Himahleh leitung ah a tan ding a kilawm Pathian in pelou bang in kilang mah leh, Laisiangthou a imuh bang in leitung a pahtawina sang a thupizaw van a koihpih ana hi zaw hi. Pathian adia i panna ah i kinepna bang pahtawina, minphatna leh zahna tangzou lou i bat hun om thei tham hi. Himahleh lunglel kei lehang Pathian in Amah adia i thuakna leh igimnate mangngilh dek lou hi. Mosi mangngilh lou Pathian in ei le hon mangngilh lou ahi chih thei thakthak ni.
Unaute zingpha. Tuni hun zatnuam chiat.