Huan, kum sawmngana bel na kipahpih ding ua, gamsung teng teng ah, huai a om tengteng kiang ah noplenna thu na phuang ding uh: nou ding in Jubili ahi ding a; mi chih in nou a chiat na nei nawn ding uh; mi chih amah inn sungkuan ah a om nawn ding (Lev.25:10)
Israel-te gamchiam a tun ua kipan kum 50-na tuh Jubilee kum hi ding a, hiai kum in gamte a neitu diktak (original owners) pen kiang ah piakkik hi ding a, mihing suak leh sal a kizuakte leng suahtak sak in om ding uhi. Hiai tuh thil tengteng, gam leh mihingte leng, Pathian’ aa vek ahi chih latsakna ding ahi. Hiai kum in michih in amah a mah nei nawn chiat ding uhi (25:13, 17, 38, 43, 55).
I Toupa Jesu a khanletna khua Nazareth a hong tun in kikhopna inn ah lut in Zawlnei Isai laibu apan hiai a hon sim hi: _”Liangvaite kiang ah Tanchin Hoih hilh ding a n’on seh ziak in Toupa Kha tuh ka tung ah a om; Ama’n a hon sawl, salte kiang ah pawtna thu leh, mittawte kiang a mitvak neih nawnna thu gen ding, simmoh thuakte pawtsakna ding. Toupa lungkim kum thu gen di’n, chih”_ (Lk.4:18-19).
A ban a genzomna ah hiai Laisiangthou tang tuh amah a hihtangtun ahi chi hi (Lk.4:21). Ei a ding in Jesu’n kross ah Jubilee kum hon tangtung sakta hi. Hon neitu diktak kiang ah hon pekik nawnta a, khelhna sikha akipan hon suakta sakta hi (Rom. 6:6-7; 8:11, 15). Huaiziak in saltangte kiang ah suahtakna om ahi chih tangkoupih lehang, tanchinhoih genna tuh Jubilee tangkoupihna hoihtak suak ding hi.
Unaute sunnungpha. Tuni hun zatnuam chiat