Huaiziak in tu’n, bawngtal sagih leh belamtal sagih la unla ka sikha Job kiang ah hoh unla, nou a di’n halmang thillat lan un; huchi’n ka sikha Job nou a di’n a thuum ding a; amah vang in ka sang dia, huchi’n na haina uh dungzui in na tung uah ka hih kei ding; ka sikha Job bang in lah ka tanchin thildik na gen ngal kei ua, chi’n (Job 42:8).
Hiai bung ah Pathian in chi thum in Job diktatna agen hi.
- Job lawmte kiang ah Pathian in thudik genlou uh ahihdan agen hi. Amau Job thuakna tuh a khelhna ziak hi ding in ngaihdan a nei uhi. Himahleh Pathian in diklou ahihdan agen hi.
- Pathian in a lawmte kiang ah Job in amau adia halmang thillat a bawlsak theihna ding in bawngtal sagih leh belamtal sagih la a Job kiang a hoh ding in a hilh hi.
- Job in amau adia thumsak ding in Pathian in a hilh hi.
Job dikna chet ahi. Mi dik himahleh diklou tak (unjustly) in a thuak hi. A lawmte a ding in kithoihna a latsak in (mi khial na hi chi’n ngoh ekek mah le uh), a thumsak hi (amah thuakna gimsaktute himahle uh).
Hiai a Job nasep in bang hon ngaihtuah sak a? Khrist thuakna hon ensak hi. Laisiangthou a tangthu tuamtuam om mahleh hiai Job nasep sang a Khrist thuakna toh kibang zaw tam hetlou hi.
Bang ziak a mi hoihte tung a thil hoihlou tung ahia chih Pathian in a dawnna i mu kei hi. Himahleh huai dawnna sang in Pathian thilhih a thupi zaw hi. A tapa mahmah in a nasep dingte a hon musak zaw hi.
Pa aw, bang ziak a na ta ginom taktak ten thuakna haksa taktak nei sek ahi ua chih ka theisiam kei uhi. Na tapa kou sik leh tang a thuak din na hon sawl ziak in na min ka phat uhi.
Unaute zingpha. Tuni hun zatnuam chiat