Ngai un, a thuak mite tuh nuamsa i chi ua; Job kuhkaldan bang na za ua, Toupa’n a tawp a a hihdan leng na mu lai ua, Toupa tuh hehpihna a a dimdan leh zah a ngaih theihdan leng (Jak.5:11)
Job thuak bang a haksatna huaisia thuak om ding in gintakhuai lou hi. A gan neih teng, a tapa sagih leh a tanu thumte, leh a suak neih teng, tangkou di khat kia chihlouh ni khat thu in a si vek uhi. Hiaite kia hilou in amah taksa tung ngei ah natna huaise tak a thuak lai hi. A haksatna behlap ding in a panpihtu ding, a zi na san in theisiam lou in, Pathian gen sia a si mai ding in a sawl zomah hi. Haksa sa mahmah ahi dia; a pian ni nasan a hamsiat hial hi. Himahleh Pathian gensiatna leh phunkhumna paukam khat leng a zang kei hi. Job ana omlou hileh i tuahsiat lai, i lungngaih nite ah bang chi’n i kikhamuanta phet de aw chih in a om hi. A khonung in Pathian in a leh nih in a vualzawl na mah a, a phu mahmah hi.
Job bang a haksa tuamtuam i thuakte midangte kikhamuanna ding, vualzawlna tamsem i tan theihna ding hi kha thei hi. I thuaknate ziak in Pathian gensia in taisan kei ni.
Unaute zingpha. Tuni hun zatnuam chiat.