Frank E. Graeff in kum 40 a chin ma in a it mahmah a sanggamte Ann (1880), Sallie (1882) leh Arasma Graeff Oliver (Feb.14, 1901) ana suun ban ah anu Matilda Zerbe Graeff (Sept.3, 1886) leh apa Samuel Beard Graeff (March 25, 1887) leng a kum kizom in ana suun hi. Sihna ziak a lungkhamna leh thawmhauna toh kidim hinkhua a hon zat chiang in Jesu’n hon awlmoh a hon khotuah taktak mah ahi diam chih dotna toh hinkhua hon zang hi. Huchiin 1901 kum in Jesu’n Hon Don Hiam? chih la thu etlawm tak hon gelhkhia hi.
Ka lunggim chian Jesu’n hon don hiam?
Kipaktak a la sadi’n,
Puakgik leh lungzin na’n hon don chiang in,
Ka lampi sau leh tawlhuai hi.
Frank E. Graeff bang in na hinkhua a na thiltuah khakte ziak a lungkham, mangbang leh vangsia kisa a lungkia in na om kha ngei hiam? Lungkiakna, lungkhamna leh mangbatna ziak in na hinna nangawn manna bei a bat hun a om ngei hiam? Mahni kimohsa in, midangte sang a thuak law tuam in na kingaihtuah ngei hiam? Hiai bang hun in Jesu’n hon awlmoh a hon khotuah taktak mah ahi diam chih dotna neih baihlam mahmah hi.
Laisiangthou in “Aman a hon limsak gige ziak in na mangbatna tengteng uh amah ah nga vek un” (1 Pet.5:7) achih pansan in Frank E. Graeff in Jesu’n hon awlmoh a hon khotuah gige ahihdan ana genkhia hi.
Hon awlmoh hon khotuah ka thei,
Ka dahna hon thuakpih hi;
Zan khosawt chimhuai leh
Sun hun tawlhuai ah,
Ka hondam pan hon kem.
Lungkiatna leh lungkhamna tuamtuamte miteng in ana tuak vek ua, damsung a khat vei leng a tuakkha lou omlou hi. Pathian’ Zawlnei Elijah ngei leng lungkia, lungkham leh mangbang kisa a ana om in, Pathian kiang ah sihna ana ngen hial hi (1 Kum.19). Pathian’ tapa hilhial i Toupa Jesu ngei leng lungkham tak in “Ka Pa aw, ahihtheih leh hiai nou in hon pel mahmah heh” (Matt.26:39) chi’n ana thum hial hi. Hun paisa ah Pathian’ mi ten ana tuak ua, tu hun in leng a tuak ua, maban ah leng a om tou lai ding uhi. Hiai bang haksatna ituah hun chiang in eimah thahatna leh lemtheihna toh maituah mai lou in; hon awlmoh gige Jesu muang in Amah bel le hang Aman tua haksatna apan suahtakna leh zangkhaina hon pe ding hi.
Lungkhamna, dahna, vangsia kisakna leh lungkiakna tuamtuam ten na hinkhua hon tuam in, na lamet phaklouh damlouhnate thuak in na om ngei hiam? Jesu’n hon awlmoh in hon khotuah gige hi. Damlouhna tuamtuam thuakte, zeng natna neite, numei kum 12 sipawt, phak natna neite leh mittawte ana hehpih mahmah in damna ana pe zel hi (Matt.9:35, Mk. 2:9-12; 5:224-34 Lk.17:12-16; Jn.9:6-7). I lamet phaklouh damlouhnate i tuah a, i it mahmahte sihsual a damlou a lupna ngak a aom hun chiang un amaute hihdam ding in leitung ah Jesu om nawn kei mahleh hon don in hon awlmoh gige hi. Laisiangthou in “Amah mah in bangchik mah in kon donlou kei ding a, pai leng kon paisan ngei kei ding achi ngal a” (Heb.15:5) chi hi. “Nou semgim leh puakgik paw tengteng aw, ka kiang ah hong pai unla, kei man khawlna kon pe ding” (Matt.11:28) chi in lungkhamna leh hatsatna tuamtuam thuakte kiang ah khamuanna thu na gen hi. Sam gelhtu in “Pathian i kihumbitna leh i hatna, mangbat lai a huh pahpahpa nai gige ahi” (Sam 46:1) chi hi.
Frank E. Graeff kum 40 ahihma in a inkuanpih tamzaw ten sihna hanmual liamsan khinta uhi. Huaiziak mah ahi ding a sihna in i itpente hon lakmang sak chiang in Jesu’n hon don in hon thuakpihna hiam chihna dotna ana bawl hi.
Lei a itpente ka khen chiang in,
Jesu’n kei hon don na hiam?
Ka lunggim puakkham ding bang a anat chian,
Hon mu in khawk hon sak pih hiam?
Frank E. Graeff bang in sihna in na itpente hon lakmang sak in, na insungte lungkhamna leh thawmhauna toh kidim in om ngei hiam? Jesu’n hon don in hon khotuah gige hi. Pathian’ mi ginom taktak ten sihna ziak a lungkhamna ana thuak tham uhi. Jakob in a tapa Joseph si asak ziak in ana dah mahmah a, ni sagih sung an nelou, tui dawnlou in ana om hial hi (Gen.37:34-35). A itpen uleh akineppih pen uh sihna in a laksak ziak a lungkham mahmah a kap Mari leh Martha-te amuh chiang in kidek zou samlou ahi ding a, i Toupa Jesu ngei leng ana kap hial hi (Jn.11:35). Laisiangthou a tang tompen chia chiamteh a om hial tuh i Toupa Jesu’n sihna thuakte a hehpihna ziak a akahna thu ahi. Sihna ziak a lungkhamna leh thawmhauna ten Jesu lungsung a sawkkha mahmah hi.
Lungkham-mangbatnate pen leitung a i om sung in hong tung ding him ahi. Hiai bang haksatna i tuah hun a hon khotuah gige Jesu nei ihi chih mangngilh lou in, Amah kiang tun le hang, i puakgikte pawzou ding in Aman hon panpih ding hi. Kumpi David in, “Na puakgik Toupa tung ah nga lechin, huchiin Aman nag a hon hithat ding hi. Mi diktat tuh chikmah in leng hihlin a phal kei ding” (Sam.55:22) chi hi. Amah muang ngam a Amah a kinga mite pen i Toupan thawnsak ngeilou hi. I muan ngamna zahzah a muanhuai eite hon don gige i Toupa Jesu’n haksatna leh lungkhamna khempeuh thuakzou ding in hatna hon pe chiat hen!+++
Note: Hiai article August 15, 2020 a kigelhkhia ahia, WhatsApp leh saptuam bulletin-te ah kisuah ngeita hi – Admin