Mihing ten maban hong tung ding thute leh maban a ituah dingte theihnopna lianpi kinei chiat hi. Huaiziak mah in Astrologer ichihte, khutlam enthei (palmist) ichihte leh Newspaper khawng a Horoscope hong kigelh zel ten mi tamtakte lungsim lazou mawk hi. Huchimah bang in khristian-te lak ah leng i Toupa Jesu hong painawnna ding thute toh kisai bang mi tampite theihnop leh lunglutna mahmah khat suak hi.
I Toupa Jesu Khrist hong painawnna ding toh kisai Laisiangthou in honna sinsak tengteng a kim sipsip in i theizou khol kei ding. Himahleh mawlchik leh chiangtak a honna sinsak thute apan pialmanglou a, a hong painawnna ding a kisakkolh tuh i mohpuakna ahi zaw hi.
Laisiangthou mun tamtak ah hong pai nawn ding ahihdan gen in om hi. Angel ten nungzuite kiang ah van a paitou na muh bang un amah mah hong pai nawn ding ahi ana chi uh (Nas.1:10-11). Sawltak Paul in hong painawn ding ahihdan hichiin na gen hi: “Toupa Jesu van akipan a angel hatte toh a hong kilak chiang in” (2 Thess.1:7); “Toupa mahmah kikou aw toh, angel tungnungpen aw toh, Pathian pengkul ging toh, van a kipan a hong paisuk ding ahi” (1 Thess.4:15-16). Peter in a hong painawnna ding toh kisai mi khenkhat ten zekai sa mahle uh “zan a guta a hong bang a hong tung ding” achi (2 Pet.3:3-4, 9-10). Hebru laikhak gelhtu in “hotdamna mu ding a, amah na ngakte kiang ah, khelhna panglou in nih veina ah a honglang nawn ding” (Heb.9:27-28) chiin ana gen a, Johan in “amah a hong kilak chiang in, amah bang in i om ding” (1 Jn.3:2) chi hi. Jesu mahmah in leng “ka hong kik nawn ding” (Jn.14:1-3) chiin thuchiam hon pia hi. Huaiziakin Jesu hong painawnna ding toh kisai nial vuallouh in Laisiangthou in hon sinsak chih imu thei hi. Hiai mah tuh Pathian gingta a mite khempeuh in i lamet ahi.
Bangchi bangin a hong pai dia?
Mi tengteng muhtheih in a hong pai ding. “Ngai un, Amah meipi toh a hong pai, mit teng in Amah a mu dia, Amah a nak a sunpa nangawn in a mu ding” (Kil.1:7).
Thakhat in hilhkholhna omlou in a hong pai ding. “Toupa ni tuh zan a guta bang in a hongtung ding…Muanna leh bitna, chia a gen lai tak un numei nauvei bang in thakhat in manthatna a tung uah a tung ding a, a suakta kei hial ding uhi” (1 Thess.5:1-3).
Khenkhat ten Jesu Khrist guta bang a hong paina ding pen “rapture” ahia, huai nung in khat vei hong painawn ding a, huchiin leitung ah lalgam hong phutkhe ding ahi achi uhi. Himahleh sawltak Peter in, “Toupa ni zaw guta bang in a hongtung ding; huai ni chiang in van nakpitak a ging in a mangthang ding, thilbulte mei a haitui in a om ding a, lei leh a sung a nasep omte, a kangtum ding hi” achi hi (2 Pet.3:10). Hiai in guta bang a hong pai chiang a leitung leh a sung a thil om teng kangmang vek ding ahihdan hon hilh a, rapture sinsakna a diklouh dan hon musak hi.
A angelte (His angels) toh ahong pai ding. “Toupa Jesu van akipan a angel hat mahmahte toh a hong kilak chiang hun chiang in… Pathian theiloute leh i Toupa Jesu tanchinhoih thu zuiloute tung a mei kuang zuazua zang a phuba lak ahihtheihna ding in. Hiai mite, i Toupa Jesu omna mun akipan leh a thilhihtheihna thupina ma akipan tangtawn hihsiatna a gawt in a om ding uh” (2 Thess.2:7-9 cf. Matt.25:31).
Ging ngaihtak toh a hong pai ding. “Toupa mahmah kikou aw toh, angel tungnungpen aw toh, Pathian pengkul ging toh, van a kipan a hong paisuk ding ahi ngal a…” (1 Thess.4:16-17 cf. 1 Kor.15:52).
A hong pai chiangin bang achi dia?
Khrist hong painawnna tuh hun beina ahi ding. “Amah a hong pai chiang in… Aman vaihawmna tengteng, thuneihna tengteng leh thilhihtheihna tengteng ahih bei a, Pa Pathian kiang a lalgam a piakkhiak chiang in, tawpna a hong tung ding. Melma tengteng a khenuai a asikden masiah vaihawm ding ahi ngal a. Melma hihsiat a om nanung pen ding tuh sihna ahi” (1 Kor.15:23-26). Pathian in kuamah manthat deihlouh a, mi tengteng hong kisik na dia a dohzohna hun a beita ding hi (2 Pet.3:9). Huaiziak in tulel a i tenna khovel a beita ding “…Vante tuh ging ngaihtak toh a mangthang ding a, thilbulte tuh mei a haltui in a om ding ua, leitung leh a tung a na kisem tengteng tuh haltum in a om ding hi” (2 Pet.3:7-10). Hun beina ahih ding ziak in thohnawnna tuh ni tawpni a om ding ahihdan Jesun ana gen hi (Jn.6:39-40). A hong pai nawn chiang a lalgam phutkhe ding hilou in, tulel a avaihawmna lalgam Pa kiang ah pekhe ding ahi zaw hi. Jesu hong pai nawn chiang in melma nanung pen sihna hihsiat hita ding Laisiangthou in chi ahihmanin mihing ten sihna i tuahlai teng bel sihna hihsiat ahi nai kei chihna ahi.
Hankhuk sung a om tengteng thohnawnna a om ding. “Hiai lamdang sa kei un; hankhuk sung a omte tengteng in a aw azak hun uh a hong tung ding, huchiin a hong pawtkhe ding ua, thilhoih hihte hinna tang in a thounawn ding ua, thilhoihlou hihte bel, siamlouh tang in a thounawn ding uh” (Jn.5:28-29). Thilhoihlou hihte leng thounawn ding uh chi ahihman in khalam thohnawnna, baptisma gen hilou in taksa a misite thohnawnna gen ahi chih imu thei hi “…Khrist a sisate a thou masa phot ding ua…” (1 Thess.4:16), “…huchiin hingdam a omlaite mitphiatkal a hihlamdan a om in sihtheihlouhna silhsak in om ding uhi…” (1 Kor.15:50-55).
Thukhenna a om ding. Ni tawpni chiang in mi tengteng Pathian thu tungtawn a thukhen in om ding hi (Jn.12:48). Pathian in, “a misehpa tungtawn in diktat tak a leitung pumpi thukhenna ding hun a sehsak hi. Aman a misehpa misi lak akipan kaithou in, ka misehpa hiai ahi chih mi tengteng muh ding in a langsak hi” (Nas.17:30-31). Kel nam leh belam nam kikhenna om ding hi (Matt.25:31-46).
Pa kiang ah lalgam piakkhiak hi ding. Jesu hong pai nawn chiang in lalgam phutkhe ding hilou in, lalgam Pa kiang ah pekhe ding a, hun tawpna hi ding (1 Kor.15:24). Peter in “Goutam setheilou, nin baanglou leh tul theilou van ah koihkholh in a om” (1 Pet.1:3-5) achih bang in khalam kipahman imuh theihna ding in khalam lalgam tuh Pa kiang ah piak hita ding hi.
Pathian thu zui loute gawt in om ding uh. Pathian theiloute leh Khrist tanchinhoih thu zuiloute “tangtawn hihsiatna a gawt in om ding” (2 Thess.1:7-9). Pathian thu zui utloute tan ding bel “diabol leh a sawltakte adia kibawl tangtawn meidil” hi ding hi (Matt.25:41,46).
Bangchik chiangin a hong pai dia?
Matthew 24 ah Jesun AD 70 a Jerusalem suksiat a omna ding toh kisai chiamtehna bangzah hiam na gen hi. Himahleh hiai chiamtehnate Jesu hong painawnna ding chiamtehna ahi kei. Mi tampi ten hiai a chiamtehna kigente Jesu hong painawnna ding chiamtehna a sak ziak un khovel buaina om zek chiangin kigen tam mahmah hi. Himahleh hiai tuh a thutuun theihkhelh ziak ahi.
Jesu leh anungzui ten Jerusalem temple (Biakin) thupitak a etlai un a nungzuite khat in, “Heutupa en dih, a suangte a nak let theihdan, hiai inn a nak thupi dan” chi hi (Matt.24:1; Mk.13:1; Lk.21:5). Huchiin Jesu’n “hiai suangte, hichip louh a suang kithuap himhim khat lel leng a om kei ding” (Matt.24:2; Mk.13:2; Lk.21:6) chiin a dawng hi. A temple thupi lua ahihman in nungzui ten khovel tawp hun lou a kise ding a gingta lou ahi ding ua, “Hiai thilte chik chiang a hong tung ding ahia? Na hong paina ding leh khovel tawp ding chiamtehna bang ahi dia?” (Matt.24:3; Mk.13:4; Lk.21:7) chiin dotna nih bawl uhi.
Jerusalem temple siatna ding toh kisai dotna masa “Hiai thilte chik chiang a hong tung ding ahia; hiaite hong tung dekta ahi chih chiamtehna bang a om dia?” (Mk.13:4; Lk.21:7) chih pen tang 34 tan ah hon dawng masa hi (Mk.13 leh Lk.21-te leng hoihtak in sim in). Temple suksiat a om dekta ahi chih a theihtheihna ding un chiamtehna bangzah hiam Jesun pia hi. Huai chiamtehna khenkhatte tuh zawlnei taklou (24:5), kidou thu leh kidou thuthang (24:6), kial (24:7), hii leng (24:7) zinling (24:7), sawina (24:9), pialmangna (24:10-12) chih leh namchih kiang a tanchinhoih kigensuak ding (24:14) chihte ahi.
Hiai chiamtehnate tengteng AD 70 a Jerusalem suksiat a om ding genna ahi chih bang chidan in i theithei dia? Hiai chiamtehnate baan a Jesu thugen ten Jerusalem suksiatna ding gen ahihdan a latsak ban ah hong painawnna ding toh kisai kha theilou ahihdan chiangsak mahmah hi.
- “Hiai thil tengteng a tangtun kim sipsip masiah hiai khang (this generation) abei kei ding” (24:34). Hiai khang (this generation) achih in Jesu thugen hunlai a khang (generation) gen ahi chih a chiang hi. Amau khang a om nawn kei a, sih leng a sihkhin vekta uhi. Matthew laibu ah “generation” (khang) chih thumal zat ahihchiang in mi tengteng genna in kizang lou hi (cf.Matt.1:17). Hiai in a hong painawnna ding thu genlou ahihdan a latsak ban ah AD 70 a Jerusalem siatna ding gen ahihdan chiangsak hi.
- “Hihmangbangpa kihhuai, zawlnei Daniel gen, mun siangthou a ding na muh chiang un…” (24:15). Luke in a gelhna ah hichiin gelh hi “Sepaih te’n Jerusalem khua a um uh na muh chiang un, a mangthang dek chih thei un…” (Lk.21:20-22). Rome sepaihte hong pai a muh chiang un nungzui ten khopi nutsiat hun ahi chih a theithei uhi.
- “Tang sang lam ah taimang uhen” (24:15-19). Khenkhatte sinsakna bang a Rapture bang om ding hileh leitung a misiangthoute kuamah nutsiat a omlou ding chih ahihmanin hiai in omzia nei theilou ding hi. Jesu hong painawn chiang a tang sang lam a tai chih om theilou ding ahihziak in a hong painawnna ding gen ahi kei chih chiang hi.
- “Na taimang hun ding uh phalbi lai hiam, Khawlni in hiam a hongtun louhna ding in thum un” (24:20). Jesu hong painawnna ding gen hileh hiai in bang phattuamna a nei dia? A hong painawnna ding gen ahi kei chih a chiang hi.
Jesu’n chiamtehna agente a theih ziak un Jesu nungzui khat lel leng AD 70 a Jerusalem suksiat ahih lai in asi a om kei uh chih Khangthu gelhte (Historians) apan i theithei hi.
Nungzuite dotna nihna a hong painawnna ding leh khovel tawpna ding toh kisai a dawn patna ah “huai ni leh dak ding kuaman a thei kei, van a angel ten leng a thei kei uh, himahleh ka pa kia in a thei” (24:36) chi hi. Huaiziakin a hong painawn hun ding Pa kia lou ngal a thei omlou hi. Mi ten “muanna leh bitna” achih chih laitak uh hi ding ahihdan bel Paul in ana gen hi (1 Thess.4:1-3). A hong pai zekai ziak in ahong pai nawn kei ding chihna ahi kei (2 Pet.3:3-10). Mi khenkhat ten a hong zekaina pen hong pai nawnlou ding chihna dan in a ngaihsun mai thei uh; himahleh hiai bang mi ten a tupmawng un tuichim tun ding thu leng ana gingta nuamlou uhi. Tuichim tungtawn a leitung ana hihsia, huai thu mah in hiai leitung leng mei a hihse ding ahihdan Pathian in thuchiam ana bawl hi. Mihingte ngaihtuahna bang in Pathian in hun ana en gige kei; ahihhangin a thuchiam a ginom Toupa tuh zanlai a guta bang in mi ten a gintaklouh laitak un a hong pai ding hi. Huaiziakin nin baanglou leh gensiat bei a hon muh theihna ding in theihtawp suah a panla chiat ding in ikihasuan uhi (2 Pet.3:11-14).
Jesu kipahman pe dia A hong chian,
Sunlai hiam zanlai hiam in,
Ginom a Amah ngak in hon mu diam,
I khawnvak bawlsa vak in?
Aw manta ung ichi thei diam unau? I Toupa Jesu tuak ding a kiman nailou na hihleh Amah ging inla (Jn.3:16), Kisik in (Nas.3:19), Jesu Khrist tuh Pathian’ tapa ahi chih kam a Gum in (Rom.10:9; Nas.8:37), Na khelhnate ngaihdamna ding in Baptisma tang inla (Nas.2:38; Mk.16:16), Huchiin Hotdam in na om ding (1 Pet.3:21); Sih tanpha in ginom in huchiin hinna lallukhu piak in na om ding (Kil.2:10).
Note: Hiai article pen Covid-19 first wave lockdown om sung April 02, 2020 a ka gelhkhiak masak ahia, saptuam bulletin, WhatsApp group leh mun tuamtuam ah leng ana kikoihkhe ngeita hi – Admin