Huaiziak in Toupa’n Assuria kumpipa tungtang thu hichi’n a gen, Hiai khopi a hongtung kei ding, hiai lai ah leng thal a kap sam kei ding, lum toh a kiang ah lah a hong pai sam kei ding a, a kho zul ah lah lei a se sang kei ding uhi…Kei ziak leh ka sikha David ziak in hiai khopi humbit ding in ka veng ding hi, chi’n. Huchi’n huai zan in hichi ahi a, TOUPA angel a kuan khia a, Assuriate giahmun ah mi nuaikhat singgiat-le-sangnga a that a; huan, zingkhang a a hong thoh uh leh, ngai in, misi luang ngen a na om maimah (2 Kum.19:32,34-35).
Tuni a i tangteel a angel hong kuankhiak dan mit in i Toupa Jesu sihna ensin mah dih. Angel ten leng midangte mah bang in Jesu sihna thu a theisiam kei uhi (1 Pet.1:12).
Jesu hong mat lai un ut hi leng angel sangguk mun sawm-le-nih ngen thei ka hi chi hi (Matt.26:53). Hiai hun in angel khat leng amah kiang ah om khinta ahi chih i thei hi (Lk.22:43).
A kiang a angel om pen lungsim ah bang om din na ngaihtuah ua? Jesu humbit dia sap a om kal ngaklah tettet din a gintakhuai hi.
A chiamnuih bawlkhum dan uh, a chilsiat khum dan uleh a vuak dan bang uh angel ten en ding uhi. Lamdang a sak ding dan uleh a lungdon ding dan uh na mitkha in na mu thei hia? Kumpi Hezekiah ngetna ziak a bawn angel sawl a om a, Pathian’ tapa tang neihsun Apa kiang a kapzen a akikou lai in bang chibang phet in kuankhiak kal angel ten a ngaklah ding ua?
Lamdangsa tak a Pa Pathian kiang lam en in, a Toupa uh hutkhiakna dia thupiak a muh kal uh ngaklah mahmah a om ding dan uh mitkha in muhtheih hi. Siam a a om ua kipan a biak uh, a Toupa uh kilhlup in om hi.
Dai dinden in thupiak ngak in om ua…Pa akipan thupiak bangmah a muta kei uhi.
Gawt in a om a…kross ah kilhlup in om a…a sisante a kai niuniau hi…Huchiin hong kapkhia in, “Ka Pathian, Ka Pathian, bang dia hon taisan na hia?” chiin kikoukhia hi.
Hinapi in Amah hutkhiakna ding a thupiak a om tuan kei hi.
Itna lamdang! A min ngaih e!!
Pa aw, ka khelhna ziak ua thah a om Belamnou leh Nang angel ten hon biak mah bang un kou leng na mai ah khupboh in ka hon bia uhi.
Unaute Toupa’ ni zingpha. Tuni kikhop nuam chiat.