Huai Jesu tuh Pathian in a kaithou nawnta ngei a, huai a theipihte ka hi vek uhi (Nas.2:32).
Na ginglel ngei hia? Sih ding khawng ngaihtuah in khenchiang in vangam na kai ding leh dinglouh khawng kimuangmoh in na om ngei hia? Ahihkeileh thohnawnna om taktak mah ahi diam chia ginglel in na om ngei hiam? Na sihnung a athupina toh kizem a om, a thounawn Jesu na muh taktak ding leh dinglouh khawng ngaihtuah in na om ngei hia?
I hinkhua ah ginglelhna i neih hun om thei tham hi. Ahihleh huai hun chiang in bang ichi dia? I ginna kibulphuhna: “Jesu Khrist thohnawnna thu” ngaihtuah zelzel lehang ichi hi.
Nasepte laibu i sim leh sawltakte’n hiai thohnawnna thu agen poimoh mahmah uhi. Amau mahmah leng huai thohnawnna a mit mahmah ua theihpihtu (eyewitnesses) ahihziak ua sawltak hi dia sapte ahi uhi (Nas.1:8, 21-22). A thugenna uh a kigelhkhakna teng phial ah hiai thu a gen tel teitei uhi (2:32; 3:15; 4:10, 33; 5:31; 10:40; 13:30; 17:31; 22:8).
Amau a ngaihtuahna ua om dia a gintak ziak uh hilou, a taktak a ana om, a mit a amuh uh, a thounawn Jesu mahmah toh kithuah a, an nekhawm a khosate ahi uhi. Hiai ziak mah in anung azuihna uah thuak ngap in, sihpih ngam in ana pang uhi. Theichian lou hile uh bangziak a hai thuak mawk ding uh? Nelhsiah a om ua, tai a om ua, vuak a om ua, suangkulh a khum a om ua, thah a om zomah lai uh. Hiai Jesu thu gen nawnlou dia vau a a om hun ua leng, “ka thilmuh uh leh ka zakte uh genlou in ka om thei kei uh” chia dawng a, a theichian mahmahte ahi uhi (Nas.4:20).
Huaiziak in ginlelhna na neih hun ah hiai i thugin kibulphuhna ah kiptak in kibulphuh thak in. Sawltakte ginlelh huai lou uhi. A mit a amuh uleh a thugente uh theichian mahmah uhi.
Toupa aw, ka hon gingta uhi. Ka ginlelh khak seknate uah hon panpih in.
Unaute zingpha. Tuni hun zatnuam chiat.