Himahleh Zerui tapa Abisai in a dawng a, TOUPA sathau nilhpa a hamsiat ziak in Simei pen hihlup ding ahi kei dia hia? a chi a. Huan, David in, Nou Zerui tapate aw, noute hon na theihsak ding uh bang ahia om? Tuni’n kei hon doute na hi kei uh maw? Tuni a Israel lak a mi mawngmawng hihlup ding ahi hia? Tuni’n Israel mite tung a kumpipa ka hih a theilou ka hi maw? a chi a. Huan, kumpipa’n Simei kiang ah, Na si het kei ding, a chi a. Kumpipa a kiang ah a kichiamta hi (2 Sam.19:21-23)
2 Samuel laibu akim khat vel akipan a tawp lam (second half) i sim leh khelhna pap (consequences) om ahihdan muh theih hi. Pathian in hehpihna ahau a, David leng a khelhna ziak in a si sak kei hi. Himahleh hinkhua “happily ever after” (a hinkhua teng kipaktak in hon zang) hi hetlou hi. David hinkhua akipan khelhna in damsung a kisikna leh lungkhamna hon tun thei ahihdan i mu thei hi.
Bang teng hileh, a khelhna in David hinkhua ah kingaihniamna om sak a, a hinkhua mi hoihzaw ding in bawlkhia hi. Hiai tuh Absalom sih nung a kumpi laltutphah hon luah nawn hun a amelmate a bawldan apan leng muh theih hi. Tuni a i tangteel a imuh bang in phuba lak theihna ding hun ah leng a melmate tung ah zahngaihna suah zaw sop hi. Hiai bang a midangte tung a ahihtheihna tuh a tung a Pathian zahngaihna amuh chet ziak ahi hi.
David hinkhua bang in ei hinkhua ah leng i chitlouhna leh khelhna ziak a i thuakna ten i hinkhua pen a hoih zaw ding in hon bawl thei a, huai ding in eilam pen bawl theih a i om masak poimoh hi.
Unaute zingpha. Tuni hun zatnuam chiat