Kuapeuh dangka deihta dangka in a lungkim kei ding; kuapeuh hauhsakna punna deihta leng: hiai leng bangmahlou ahi (Ekl.5:10).
Miteng in hihtheih tawp suah in khovel gou, neih-leh-lam kikhol chiat a; himahleh hiaite tengteng bangmahlou ahihna kuaman kimu theilou hi.
Laisiangthou ah Jesu’n mihau hai gentehna thu ana gen hi. Abuh leh baal a hong pun mahmah ziak in a koihna ding om nawnlou a, a lianzaw lam ding in a hong kisa hi. Huchiin a kha kiang ah, “Kha, kum tampi sung a ding tampi na khol a; khawl inla, ne in dawn inla, nuam tak in om in” achi hi. Himahleh zan chiang a akha laksak a om ding ahihdan a thei kei hi (Lk.12:16-21).
Khovel ah gou tampi nei in hau mah lehang Pathian lam a i hauh keileh a phatuam kei hi. Ineih-ilamte Pathian adia i zat kei leh manna bei ahi. Ei a ding kia a kholkhawm hilou a, Pathian a ding in bangzah ka pe thei a chih ngaihtuah zaw ni.
Unaute zingpha. Tuni hun zatnuam chiat.