Ka kha in ka hinna a chimtak a; ka utdandan in ka phun ding hi: ka kha thangpaihna in ka gen ding (Job 10:1).
Covid-19 hong om akipan mask bulh chiin dan khat in omta a, mask i bulh chiang in i mel bang tan hiam a sel kha hi. Huchibang in i hinkhua ah leng mask kibun kha sek hi. I lungsim tawng tak ah lunggimna nei le hang leng, milak ah kipah mel in ki-om teitei sek hi. Taksa, ngaihtuahna leh khalam ah i bah mahmah hun in leng, midangte muh in a dam dandan, a kipak dandan, a nuamsa dandan in ki-om sek a, midang i dinmun hon dot chiang un leng “hoih zel” chi in kidawng zel hi.
Himahleh a taktak ah i chidam het kei a, i kipak het kei a, midangte muh a kipak dan a i omte tuh kiliahkhuhna lel ahih hun a om sek hi.
Huaiziak ahi ding tamtak ten Job tangthu bang i lunglut tangpi uh. Aman a ngaihtuahna leh a hinkhua kiseel leh zum hetlou in Pathian mai ah a genkhia hi. Ahihna bangbang in a om a, kibawl tawm in a kipak dan in a om het kei hi. A haksatna, a dahna, a thuakgimna leh a ning kitelna tuh midangte leh Pathian theih ding a lau het kei hi.
Pathian toh kisai a gen teng a dik ahi vel kei hi. Himahleh a haksatna leh ning kitelnate ginom (honest) tak in Pathian mai ah a gen hi. Seel om hetlou a, lungsim tawng tak a ginomna toh Pathian mai a kiphoukhiak a, thumna neih leh a polong a neih kibang hetlou hi. Hiai bang ginomna Pathian in a deih zaw hi.
En leng huai bang in hih lehang Job bang in pilna i neih loh thei zaw hi.
Unaute zingpha. Tuni hun zatnuam chiat