Huan, TOUPA thu ka kiang ah a hongtung nawn a, ka kiang ah, mihing tapa, ngai in, thakhat in na mittaina pen ka hon laksak ding a, na sun ding ahi kei dia, na kah ding leng ahi sam kei, na khitui leng a kiak ding ahi kei hi. Asim in thum inla, misi suunna himhim nei ke’n, na dial khim inla, na khedap bulh inla, na muk hum ke’n la, mite an leng ne ke’n, a chi a. Huchi’n zingsang lam in mipite kiang ah thu ka gen a, nitaklam in ka zi a si maimah a; huan, zingsang lam in a hon thupiak bang in ka hi (Ezek.24:15).
Pathian in thil mak (strange) pipi Ezekiel a hihsak muh theih in om hi.
- Pau nawnlou ding a koih in a om hi (3:24-27).
- Teklei tung a Jerusalem khopi lim gelh a, amah leh khopi kikal a sik baang tung ding a hilh in a om hi (4:1-3).
- Ni 390 a veilam pang delhkhum a lum ding leh huai zoh chiang a ataklam pang delh a ni 40 lum dia hilh in a om hi (4:4-8).
- Huchia a lup sung bawng ek zang a an nek ding amah mah kihuan ding in a hilh hi (4:9-17).
- A multe met a seh thum suah a hihse ding a hilh in a om hi. Hiai tuh Pathian in Israel a suksiat ding dan a lahna ahi hi (5:1-12).
Hiai ngeina banglou Pathian’ thupiak in thiltup anei a, Israelte dinmun a ensak hi. Mite’n a muh theih ding uh ensaktu ahih theihna ding in Ezekiel in ngeina sang a sangzaw (extraordinary) a akipumpiak a ngai hi.
Hiai tengteng ban ah thil haksa pen Pathian in hih ding in a sawl a; huai tuh a zi laksak ding a, himahleh kaplou, suun lou leh a mittui kesak lou a om ding in a hilh hi. Ezekiel in hiai thupiak leng a mang hi.
Pathian’ siampute ihihna ah hiai a sikha Ezekiel i bangzou sam diam?
Pa aw, na sikha Ezekiel lamdang leh thupi kasa mahmah uhi. Nang thu aman zohna ding a aginna leh ahangsannate ka neih zoh sam na ding un kou leng ginna hon pia in.
Unaute zingpha. Tuni hun zatnuam chiat.