Toupa’n a thaunilh, Kura (Cyrus), namte a ma a phukpai ding leh, kumpipate kawnggakte phelsak ding leh, a ma a kongkhakte honsak ding leh, kulh kongkhakte khak louh a omsak dingpa, a khut taklam ka letpa kiang ah, hichi’n a chi (Is.45:1).
Tuni a i tangteel tuh Persia kumpi Cyrus toh kisai genkholhna ahi. Aman 539-530 BC sung vel vaihawm hi. Himahleh amah lal ma kum 150 vel in Isai in amin a gen in Judate agam ua kiksak a, Pathian biakin (temple) a lamsak nawn ding dan ana genkhawl khin hi (44:28).
Kumpi Cyrus in Pathian thei ngei kei mahleh Pathian in vanzat in a zang hi (45:4). Cyrus in kipahman deih ziak hiam, a man (payment) deih ziak hiam a Pathian mi saltangte a pawtsak ahi kei hi (45:13). Belamchingpa (shepherd) ahi chih (44:28) kia hilou in, “thaunilh” (Hebrew ah messiah) chih bang a leng genkholh in a om hial hi (45:1).
Pathian in a ut peuh kuapeuh zang in ahih thei chih Cyrus hinkhua akipan in kimu thei hi. Namte (nations) tung a vaihawmtu ahia; kumpite leh mi a ut peuhmah a thiltup tangtungsak ding in a tungkhe zel hi.
Kumpipa lungtang Toupa khut a om ahi tui lampite bang in; a utna lamlam ah a hei hi (Pau.21:1).
Unaute zingpha. Tuni hun zatnuam chiat.