Toupa Pathian in, pasal amah kia a om ahoih kei. Amah panpihtu ding dia kilawm ka bawlsak ding, a chi hi (Gen.2:18)
Pathian in pasal a bawl in, ganhing tengteng amah min phuaksak ding in a kiang ah hon pi chih Genesis 2 ah imu hi (Gen.2:18). Mi masapen, Adam in ganhing tengteng anu (female) leh apa (male) om chiat a, mihingte pen apa (male) kia om ahihdan a theihsuahna ding in hun bang tan a la dia?
Bang ziak a mihingte pen apa (male) kia bawl a om se ahi dia? Bang ziak a ganhingte Adam ma a pi a hong om se ahi dia? Laisiangthou ah Pathian in hoihlou a sak thil tampi a om mahleh hoihlou a sak masakpen tuh pasal amah kia a om ahi hi.
Pathian in mihingte adia a thilgeel thilhoih ahi a; Adam tuh asia, a hoihlou (defective) ahi kei hi. Mihingte i kisuansawnna ding ah numei leh pasal poimoh ahihman in numei siam ding Pathian thilgeelna ah ana om tham a, mihingte (humankind) zou nailou ahi zaw hi.
Ahihleh bang ziak a Pathian in numei a siam ding zekaisak ahi dia? Pasal in numei a poimohna a kitheihsuah deih hi kha ding hi. Pathian in hihtheihna (potential) tampi toh pasal bawl mahleh, a hihtheihnate kia toh a hinkhua bukimlou (limited) hi. Hiai mah tuh Adam kiang a lah leh theihsak (shown) a poimoh hi. Huaiziak hikha ding hi hihtheihna tampi toh a bawlkhiak mihing – Adam kiang a ganhingte a honpi khawm. Sinlai poimoh tak “a kibatpih midang poimoh ahi” chih a hilh nop ziak hi kha ding hi.
Hiai akipan bang sinlai i la thei a? Khenchiang in naupang te’n “kei leh kei ka kihihthei!” chi’n i panpih ding utlou sek uhi. Mahni kia hithei kisakna mihing ngaihtuahna ah om baih mahmah hi. Himahleh mahni kia a ding thei kuamah omlou hi. Midang poimohna nei ihi, mahni kia a ding zou omlou ihi chih kitheih mohbawl utsim mah lehang, a taktak ah hitheilou hi. Nna khenkhat ei kia a i sepzoh theihlouh om hi. Mi thupipen ten leng midang poimohna nei ihi chih i pomsiam poimoh hi. Hiai tuh panpihna ichih ahi hi.
Hiai panpihna tuh tamtakte a ding in koppih, pumkhat i hihpihte ahi uhi (Gen.2:24). Himahleh khenkhat koppih neilou a hinkho zang a om ua, a diklouhna omlou hi. Jesu leh Sawltak Paul-te leng koppih neilou a hinkho zang ahi uhi. Koppih i nei in, nei kei ta le zong, kua hiam khat hon panpihna i poimoh hi. I kingakna ding, i nuihkhawmpih ding, i kahpih ding leh i lungsim kikuppih ding i poimoh hi. Mahni kia ihih chiang in ei kia a ding mah lungsim ah om a, himahleh midang toh i hih chiang in midang a ding lungsim geelna, itna leh ei mahmah leng midangte adia kipumpiak theihna lungsim kinei thei hi. Hiai mah tuh Pathian toh i kizopna, hong kipumpiakna leh hon itna theihsiamna ding in a poimoh hi.
Hiaite i hinkhua ah zang ni.
Unaute zingpha. Tuni hun zatnuam chiat