Mosi leh Aron in omkhawmte suangpi bul ah a omkhawm sak ua, a kiang uah, Helhatte aw, ngai un, hiai suangpi a kipan tui ko’n lakkhiak sak ding uh hia? a chi ua. Huan, Mosi in a ban a zak a, suangpi achiang in nihvei a sat a; huchi’n tui a hong pawt zuazua a, omkhawmte leh a gante un a dawn uhi (Nam.20:10-11)
Tuni a i tangteel etzual in Mosi leh Aron in a hihkhelh uh om a bang het kei hi. Himahleh aban tang 12 i sim leh Pathian in Mosi leh Aron kiang ah hiai bang in gen hi: “No’n gintak louh ua Israel suante mitmuh a no’n pahtawi louh ziak un hiai omkhawmte ka piak gam ah na pilut kei ding uhi.”
A hihkhelh uh bang ahia chih toh kisai in ngaihdan tuamtuam om hi. Khenkhat in Mosi in Pathian thupiak bang a suangpi apan tui hong pawt ding a hilh thohlou a (20:8), a chiang a asat ziak ahi chi ua; khenkhat in lah amau thupina kipia a “tui ko’n lakkhiak sak ding uh hia?” chih thumal azat ziak uh ahi chi uhi. Adang khenkhat in mipite a dawnna ua “Helhatte aw, ngai un,…” chih thumal azat ziak uh ahi chi uhi. A ziak diktak imuh louh ziak in i thei kei hi. Hiai thumte kigawm leng ahi kha thei lai hi.
A khelhna uh bang ahia chih sang in Pathian dawnna akipan mimal chiat ah hiai dotnate kidong lehang ichi hi:
Non gintak louh ziak un: Ka kampau, ka nasep leh thil bawl ten Pathian gingta taktak ka hihdan midangte mai ah a taklang kha hia? Kei ngaihdan toh a kibatlouh hun in Pathian deihdan tel ngam ding in ginna ka nei taktak na hia?
Israel suante mitmuh a no’n pahtawi louh ziak un: Midangte ma ah Pathian zahtakhuai ahihna ka langsak na hia? Ka nung hon zui leh hon theikhate mitmuh in Pathian zahtak leh ngai thupi ka hihdan ka langsak hia? Ka thilhihte ah minphatna (credit) Pathian pelou a kei kia kipekha ka hi hia?
Pa aw, nang a ginna taktak nei ding leh midangte ma a zahtakna toh hon pahtawi thei gige ding in hatna hon pia in.
Unaute zingpha. Tuni hun zatnuam chiat