Himahleh Toupa angel in Tisbe mi Elija kiang ah, Thou inla, Samari kho kumpipa mi sawlte na houpih ding in va kuantou inla, huan, a kiang uah, Israel gam a Pathian a om nawnlouh ziakin hia Ekron kho pathian Baal-Zebub dong dinga na kuan uh? (2 Kum.1:3).
Kumpipate nihna bung masa bangzah i sim leh lungsim hon hetkha thei tangthu ngaihtuah tham ching bangzah hiam om hi. Zawlnei Elijah in mi 100 sihna ding in van akipan mei (fire) nih veitak samkhia hi (2 Kum.1:9-12). Naupang ten nuihsan a akou ziak un Elijah in hamsiat a, huchiin vompi’n naupang 42 tak hong that hi. Hiai bang a Pathian zawlneite huham tak hileh kilawm a agamtat uh bang chi dan a de aw chih ngaihtuahna ah om thei hi.
Himahleh hiai thiltungte huai hun a Israel gam dinmun toh etkhawm ngai di. A kumpite un Pathian mai ah thil gilou taktak hih ua, mipite milim biakna lam ah thuklut sak deuhdeuh uhi. Pathian hing sang in pathian lemte ngai thupi zaw in a thudot nuam zaw ua, huaiziak in a nam pumpi un Pathian thukhenna maituah diing in a ding uhi.
Hiai hunlai tak a Elijah nasep tuh van Pathian kiang lam a mipite pikik nawn ahi. Thil gilou leh diklou kalh a apanna lam ah melma tampi a kibawl a, himahleh Pathian a itna ziak in a dingkip zou hi.
Pa aw, sum leh pai leh minthanna deih ziak hilou a, Nang mah itna ziak a Nang adia ginom, Elijah bangbang tam sem hon pia in.
Unaute Toupa’ zingpha. Tuni kikhop nuam chiat