A melma uh, a hinna uh zongmite ma ah, Elamte ka lunglel sak khin ding, a tung uah siatna ka hon tun ding, ka hehna mahmah tak, chih TOUPA thu pawt ahi. Amau namsau ka delhsak ding, ka hihman vek masiah. A kumpipate uh leh a heutute uh hihmang in Elam ah ka mangtutphah ka tung ding, chih TOUPA thu pawt ahi. Himahleh ni na nungte ah hichi ahi ding, Elam hamphatna ka tungding diing, chih TOUPA thu pawt ahi (Jer.49:37-39).
Tuni a i tangteelna bung Jeremiah 49 in tanglai Israel lalgam umkual leh doutu nam nga Ammon, Edom, Damascus, Kedar-Hazor leh Elam-te pukna ding a genkhol hi. Tuni a i tangteel tuh Elam toh kisai ahia, Elam tuh tulai Iran gam simlam ah ana om hi.
Elam toh kisai Laisiangthou a i simkhak masakna pen tuh Genesis 10:22 ahia, huai ah Noah’ tapa thumte lak a Shem’ tate lak ah gentel khak in om hi. Elam kumpi Chedorlaomer tuh Sodom leh Gomorrah kumpi zou a, Lot leh a inkuante gallak a la-te lak a khat ahi hi (Gen.14). Abraham in kumpi Chedorlaomer zou (defeated) in Lot a hong hunkhia hi (Gen.14).
Jeremiah in Elamte pukna ding a hon genkhol a, Pathian in kawlmong chih a dalhsak ding ahi achi hi (Jer.49:36). Himahleh tuni a i tangteel in Elam hih manthat ding a gen kawmkawm in a tawpna ah “Himahleh ni nanungte ah hichi ahi ding, Elam hamphatna ka tungding diing, chih TOUPA thu pawt ahi” (I will restore the fortunes of Elam – NIV) achi hi. Ahihleh hiai tundingnawnna (restoration) ding genkholhna koi a hong tangtung ahi dia?
Nasepte 2 i sim leh Pentecost ni a Juda hong paikhawmte lak ah Elam mite leng a telkha uhi (Nas.2:9). Tanchinhoih kigenkhiak masakna pen za kha in a pang uhi. Mi 3000 baptisma tangte lak a Elam mite leng telkha ahi ding uam? A tanchinhoih zakte uh a gam lam ua pawlut uh ahi diam? Thukhun Thak saptuam phuhkhiak ahih ni a amau leng tel kha ahi ding uam?
I thei kei a, himahleh huai mah bang sak in a om hi. Huaiziak in Jeremiah in ni nanung ah Elam tundingnawnna ding agen tuh Nasepte 2 a suktangtung hi ding in gintakhuai hi.
Pa aw, na thugente tangtung zel ahihna na Thu mah ka muh theih zel ziak un na thuchiam a muanhuai na hi chih ka thei semsem ua, ka kipak uhi.
Unaute zingpha🙋‍♂️. Unn.Ningkhozam i suun mahmah kawm in, tuni a manpha pen a hun zatnop chiat.